Russia-in Ukraine-ah ram a la chak lo

Russia-in Ukraine-ah ram a la chak lo
Russia-in Ukraine a beih meknaah zirchiangtu pahnih chuan tun hnaiah ram an zauh muang hle tih an sawi ve ve.
Britain-a Ministry of Defence chuan kar hmasa khan Russian sipaite hian March thla chhung khan Ukrainian ram 143sq chauh an la a, February-ah 196sq leh January-ah 326sq km an la tih a sawi.
Washington, DC-a think tank pakhat, Institute for the Study of War pawhin hetiang bawk hi a hmuh dan niin Russian-te hian March-ah 203sq km, February-ah354sq km leh January0ah 427sq km an la niin an tar lang.
Russia-in Ukraine ram a lak zau zawk hi thlalem thlalak leh thlalak dang dang hmanga an zir niin ram pahnihte sawiah an innghat lo.
Hetiang zela a kal a nih chuan nipui a thawt tanah chuan Russian sipaite hi hma sawn lovin an ding tawh dawn a, hei hi US President Donald Trump-a pawhin inkahhai puan tan theih tura a ruahman a ni.
Russia hian tun hnaiah sipai tam tak a tirh belh a February leh May, 2022-a thapui a thawh tirh ai kha chuan tuna a sipai hmante hi an tam tawh hle.
“Min beih tirh lakah chuan sipai hi a let nga velin an tam tawh,” tiin Ukrainian Commander-in-chief Oleksandr Syrskii chuan kar hmasa khan online publication Livyi Bereg a hrilh a. A tirah khan Russia hian sipai 1,20,000 atanga 1,30,000 a hman laiin tunah chuan 6,23,000 vel an ni tawh niin a sawi.
Sipai thahnem tak hmang mah se Russia-in Ukrainian ram chin hmun nga thena hmun khat chauh a la luah thei a, kum 2014-a Crimea a chhuhsak ang zat chauh a la la tihna a ni.
Kum 2023-a Ukrainian sipaiten nasa taka an beih let khan 20,000sq km vel an lak letsak hman a, hengte hi Russia hian a la chhuh let leh thei rih lo.
Ukraine-in nikuma an ram khawchhak lam, Donetsk-ah hlawhtlinna an chan khan 4,168sq km-a zau lo leh khaw rauhsan eng emaw zat, an ram pum zau zawng atanga chhuta 0.69% vel an la let leh hman bawk niin Institute for the Study of War chuan January khan a sawi.
Hemi tuma ram an lak let hi a hlawk hle niin an sawi a. Ukraine-a Ministry of Defence chuan hetah bik hian Russia-in sipai 4,30,790 an hloh va, hei hi motorised rifle division 36 hu zet niin kum 2022 leh 2023-a an inhloh zat a khum niin an sawi.
Russia hian an sipai hlohte hmun ruak hnawh khat turin sipai a la leh mek a, hetih rual hian indonaah an tul em avangin inzirtir leh ralthuam hman an inzir tha lo niin an sawi.
Moscow hian ram an lak apiang an puang zel a, hei hi Ukraine vauna atana an tih a ni a. Thawhtannia Russia-a Ministry of Defence-in Donetsk-a Katerinovka an lak thu a puan pawh a tak takah chuan a zim hle niin Institute for the Study of War chuan a sawi a, Donetsk hmun dang la tur pawhin kum hnih dang an la mamawh dawn niin a sawi.