Hasina-i paih thlak hnuah Bangladesh inthlan hmasa berah BNP chak chiang

Hasina-i paih thlak hnuah Bangladesh inthlan hmasa berah BNP chak chiang
Mipui lungawi loten an prime minister ni rei ber, Sheikh Hasina-i an paih thlak hnu thla 18-a an ram inthlanpui hmasa berah Bangladesh Nationalist Party (BNP) chuan chuang takin hnehna an chang.
An ram chanchina inthlan chhinchhiah tlak takah hian BNP hian seat awm hmun thuma thena hmun hnih chuang an la a, Islamist party lian ber, Jamaat chu pahnihna niin Hasina-i kaihhruai, Awami League erawh inthlan an chuh phalsak an ni lo.
BNP hruaitu, Tarique Rahman-a chu prime minister a ni dawn a, kum 15 chhung Hasina-i’n ro a rel chhunga an ram eibar dinhmun hniam tak chawi kang leh tur leh mipui rorelna tung ding leh turin hmabak ko tak a nei.
Tun tum inthlan hi mipuite pawhin an ramah mipui rorelna kalhmang dik tak an hmuh leh theihna tur niin an ngai a ni.
“Min hmangaih a ni tih in lantir hi ka lawm tak zet,” tiin Rahman-a hian Dhaka-a Zirtawpni tawngtai a hmanna hmunah a sawi.
A party mite chu chak lawma khawlaia chhuak lo tura chahin a nu, December-a thi ta, prime minister hlui, Khaleda Zia-i hriat reng nana tawngtai turin a sawm bawk.
Rahman-a hi politic-ah chhungkua atanga chawr chhuak niin a pa pawh an hruaitu hlui a ni a. Inthlak danglamna thlen ngei a intiam a ni.
Tun tum inthlan hi kum 40 chuang politic-a lo inel tawh, Hasina leh Zia-i tel lova neih a ni ta a. Awami League chu inthlan chuh phalsak an nih loh avang hian a vawi khat nan Jamaat chu eptu lian ber a ni ta a, bial 77 an la a. Kum 2024 lungawi loh lantirna atanga piang, zirlaite kaihhruai, National Citizen Party (NCP) chuan bial sarih an chang bawk.
A kaihhruai party-in chiang taka hnehna an chan hnuah kum 60 mi, Zia chhungkua atanga chhuak, Rahman-a chu Bangladesh ram hruaitu thar a ni dawn ta.
Rahman-a hi tun hmaa chhungte duhsak leh ei rua puhna lo tawk tawh niin a kawng hi a harsa ve hle dawn a. Rei tak ram danga tlanchhiaa awm bo a ni bawk a, a hmabak a khirh viau.
BNP chairman nihna pawh an inthlan hma lawk, a nu, an ram hmeichhe prime minister hmasa ber, Zia-i December-a a thih hnu atang chauh khan a ni.
Rahman-a hi BNP-a a tel tan chu kum 2001 kha niin kum 30 awrh chauh a la ni a, a nu prime minister vawi hnihna nih lai a ni a. A pa, Ziaur Rahman kha sipai hruaitu, president ni zui ta a ni a. Kum 1981 khan Rahman-a rawlthar mai a nih laiin a pa hi thah a ni a. A pa hi an ramin indan an beih laia sulsutu niin kum 1978 khan BNP hi a din a ni.
Kum 2002 khan Rahman-a hian a pa hnung zui tan tak takin in an party chhungah chanvo sang a chelh tan a, eptute chuan induhsakna niin an sawi.
A nu hun laia party-a thu a neihna chu a mi mal hamthat nana hmanga puh a ni a, a pha nasa hle a. Kum 2007 khan sipai thlawp sorkar lailawkin ei rua puha manin thla 18 a tang a, chhuah a nih hnuah London-ah a kal zui ta nghal.
Bangladesh a chhuahsan theih nan politic-a inhman loh a tiam nia sawi a awm a, kum 17 a haw ta miah lo va. Ram pawn atang hian BNP kal danah erawh a inhnamhnawih zui nasa a, kum 2018-a a nu lung ina a tan atang khan an party acting chairman a ni zui ta nghe nghe.
A nu thih hma ni nga, December 25, 2025 khan hawin January 9-ah BNP chairman a ni ta a ni.