Hate speech a inhnialna

Supreme Court chuan minority community heng Muslims te ang laka hate speech kalpui a nih laia sorkar a ngawi reng mai chu a sawisel a, mahse, Centre chuan chhang letin Kerala a naupang pakhat chu Hindu leh Christian-te a vau lai video clip a darh chuai chuai laiin eng vangin nge court chuan suo motu a kalpui loh a ti ve thung.
Bench of Justices K.M. Joseph leh B.V. Nagarathna te chuan Maharashtra sawrkar chu an state chhunga hate speech thleng chungchangah insawifiah turin a ti a, Solicitor General Tushar Mehta chuan court chu State dang Kerala leh Tamil Nadu a thil thlengte pawh enfiah hmasa phawt turin a ngen thung.
“DMK party thupuangtu chuan intluktlanna in duh a nih chuan brahmins tin te thah chimih phawt tur a ti a. FIR pakhatmah theh luh a ni lo. Tichung chuan he party thupuangtu hi a la ni zui zel tho. Kerala atanga clip hi en ula, a thlabarthlak a ni. He court hian a ngai thutak tur a ni a. naupang te chu thil sawi tir niin kan zak tur a ni a. He naupang te hian ‘Hindu leh Christian-te thi turin inring rawh se’ a ti a ni” tiin Mehta chuan a sawi a.
“Ni e, kan hria alawm” tiin Justice Joseph chuan a chhang let a.
“Chuti chu Your Lordship suo motu kalpui tur awm tak a ni,” tih Mehta chuan a chhang let a.
Justice Joseph chuan India ram chu ‘huatna chi tuhin a vial chiat’ tia sawiin chumi tihtawpna tur chu politics atanga sakhuana lak hran a ni a ti a. “Sakhua hi politics atangin la hrang ila, heng thilte hi a tawp vek ang,” tiin Justice Joseph chuan a sawi a.
Mahse, Mehta chuan hnial thungin politics leh huatna chuan inzawmna a nei lo tiin a chhang thung a. “Ni lo, politics nena inzawm vel vek zawk a ni. Politicians te hian sakhuana hi remchangah an hmang a ni,” tiin Justice Joseph chu a tang khauh tlat thung a ni.
Justice Nagarathna pawhin hate speech te chuan inlungrualna a tichhia tiin a sawi bawk a. Hate speech te chu ‘fringe elements’ tena an siam a ni a ti bawk a.
“Vajpayee leh Nehru ten thu an sawiin ngaithla turin thingtlang atangin mipuite an pungkhawm thin. Vanduaithlak takin, tunah chuan engmah ken nei si lo fringe elements ten kawng tinrengin hate speech an sawi a. India hi khawiah nge thlen in tum? India mi tinte lakah contempt action kalpui ila, he court hi khawiah nge kan thlen ang, freedom fo speech khuahkhirhna a awm em…. Intellectual lama tlakchhamna a awm a nih chuan he ram hi khawvela pakhatnaah i dah thei ngai lovang. Intellectual lama tlakchhamna hi dawhtheihlohna, hriatna tlakchhamna leh zirna tlakchhamna atanga chhuak a ni. Hengte hi kan thlurbing hmasak tur a ni a. Soceity kan nih angin heng thil te laka insumkarna nei turin kan fimkhur tlan a ngai a ni,” tiin Justice Nagarathna chuan a sawi bawk.
Justice Joseph chuan ‘superpower nih kan tum hmain rule of law kan zawm hmasak a ngai’ a ti bawk.
“Pawimawh ber mai chu zahawmna a ni a. Chu chu tihchhiat fo a nih chuan….Go to Pakistan tia thusawi te hi en teh u. Heng mite hi he ram thlangtu an ni a. In unau te an ni a. School-a thutiam in neih ‘Indians tinte ka unaute an ni’ in tih thin te kha hre ta che u. Ka old-fashioned lutuk pawh a ni thei a, thla li hnuah ka chawl tawh dawn a, kum 65 ka tling tawh dawn. Kum sawmsarih panga kalta kha chuan ram nih angin zinkawng kan zawh tan a. Kan tum ber chu rule of law zawmna ram siam a ni. Hetianga inhuatna level hniamah hi chuan lut tur kan ni lo,” tiin Justice Joseph chuan a sawi bawk.
Hei hi chhang letin Hindu party aiawha ding advocate P.V. Yogeshwaran chuan, ‘Ka client te hi he rama majority an nih chhung chuan chutiang chu a thleng ngai lovang’ a lo ti thung.