Dmitry Muratov an thangtharte beisei

Russian thuneitute chuan a newspaper an tihtawpsak chungin journalist Dmitry Muratov chu a ngawi chuang hauh lo.
Novaya Gazeta editor-in-chief leh Nobel Peace prize dawngtu ni bawk chuan Kremlin chuan Khawthlang ramte nena an inbakkaihnaah a thlen thui ngam viau a hlauh thu a sawi bawk.
“Chhuan hnih lai chu nuclear war thlen hlauhthawng lovin an awm tawh” tia sawiin Muratov chuan, “Mahse, chu hun chu a tawp ta. Putin hian nuclear button a hmet ang em? A hmet lo ang em? Tu te nge hria? Tumahin an hre lo. Chiang taka sawi thei mi pakhat te mah an awm lo,” tiin a sawi.
Russia-in February 2022 a Ukraine a run hnu atangin vawiin ni thlengin Moscow-in nuclear ralthuam kaihhnawih sawi a nei reng a, a sawi chiang ang rengin a sawi zing bawk.
Senior officials te chuan Khawthlang ram te Ukraine ralthuam pea thlawptute chuan Russia chu nawr chep lutuk lo se an ti. Ni rei lo te kalta khan Russian president Vladimir Putin chuan Belarus ramah tactical nuclear weapons dah a ni dawn tiin a puang a.
Belarus president Nikolau Patrushev chu Putin-a thian hnai ber pakhat niin ‘Russia chuan tunlai ralthuam tha ber ber hmelma te, United States pawh telin an ralthuam tichhe vek thei a nei’ tiin a sawi.
Chu chu invauna nge intihderna, chu vauna chu lak thutak chi a ni em? Muratov chuan Russia ramah chuan thil awm dan a duhawm lo zel tiin a sawi.
“State propaganda tihchhuahte chuan ram chhungah nuclear war chu thil chhia a ni lo tiin an theh darh” tiin Muratov chuan a sawi a. “Russia ramah chuan TV channel te chuan nuclear war leh nuclear weapons te chu ran chaw fak ang maiin an fak a ni,” tiin a sawi bawk.
“Missile kan nei a, missile tha, missile tha danglam tih te an sawi a. Britain leh France chungchang an sawi a, nuclear tsunami in America a hnawl vek thei tih te an sawi a. Eng vangin nge chung te chu an sawi? A chhan chu mipui ten pawm se an duh vang a ni,” a ti.
Tun hnaiah Russian state TV a sawihona neihah talk-show host chuan Russia chuan ‘France, Poland leh United Kingdom ram chhunga hmun thenkhatte chu Russia-in bei mai se a ti’ tiin a sawi bawk a.
State propaganda chuan Russia chu remna leh muanna duh ram tia thehdarh rengin, Ukraine leh Khawthlang ram te chu sual hmasaah an chhuah bawk a. Chu tak chu Russian tam tak tena an ringin an awih a ni a ti bawk.
“Russia mipuite chu heng propaganda te hian a tihlim” tiin Muratov chuan a sawi a. “Propaganda hi eng chi khat ang mai a ni a. Tute pawh hmin an awl em em a, Russia te chauh lo pawh a ni vek. Russia ah chuan propaganda hi TV channel sawm pahnih ang, newspaper sang tam tak hu, social media VK (Russian version of Facebook) ang mai niin state ideology te tan liau liaua thawktu an ni,” tiin a sawi bawk a.
“Naktuk hian propaganda tin te hi tawp ta thut se? Reh thap se? Russian ten eng tin nge an ngaih ang?” tiin Moratov chu zawh a ni a.
“Kan chhuan thar te hi an duhawm,” tia chhangin Muratov chuan, “Zirna an nei tha a, Russia maktaduai dawnin ram chhung an chhuahsan tawh a ni. Mi tam tak Russia ram chhunga la chambang te hian Ukraine a thil thleng hi an duh lo. Russia-in hremhmun a siam mek hi an duh lo a ni,” tiin a sawi a.
“Heng propaganda-te hi tawp chiah se chuan he generation te hi an tawng chhuak tan ang,” tiin a sawi bawk.
“An tawng chhuak der tawh a” tia sawiin, “Russian chet lak dan sawiseltu mi singhnih chuangte lakah criminal case siam a ni tawh a. Opposition te Lung Inah khungin an awm a. Media outlets te kharsakin an awm a. Activists, civilian leh journalist thahnem takte chu foreign agents tia puhin an awm mek tawh,” tiin a sawi bawk.
“Putin-an support base a nei tha em? Nei tha e, tam tak an awm a. Mahse, chung mite chu kum upa lam vek Putin chu an tupa anga ngai leh anmahni enkawl leh humhima thla tina an pension pea kum tina Happy New Year tia lawmpuina thawn thei tuah an ngai a ni. Heng mite hian an tu leh fate chu indona tuala kala beia thi turin an ngai,” tiin a sawi.
Nikum khan Moratov chuan a Nobel peace prize dawn chu lilamin chuta a sum hmuh te chu Ukrainian child refugees te enkawlna turin a pe a. Hma lam hunah beiseina a nei chau hle thung
“Russia leh Ukraine mipuite inzawmna pangngai a awm leh ngai tawh lovang. He vanduaina thleng ata hi Ukraine-in ngai a awh tawh dawn lo,” tiin a sawi bawk a. “Russia chuan amah dotu nia a ngaihte lakah politics thila rahbeh tumna a kalpui zui zel bawk ang,” a ti bawk a.
“Beiseina ka neih chhun chu chhuan thar thalaiteah a ni a, chung mite khawvel an thian anga thlir tute, hmelma anga ngai lo leh Russia chu hmangaih Russia pawh khawvel hmangaihtu anga ngai tute” tia sawiin, “Heng chhuan tharte hi kei leh Putin aiin dam rei ngei se ka duh a ni,” tiin a sawi bawk.