Health care scheme hman dan thlir

Health care scheme hman dan thlir
Mizoram State Health Care Society buatsaih, ni hnih awh tur Ayushman Sangam – North Eastern Regional Review Meeting chu Ningani khan Aizawlah neih tan a ni.
A hawnna hmanpuitu chief minister Zoramthanga chuan hriselna chu mihring nuna thil hlu ber zing ami, ram hmasawnna atan pawha thil pawimawh tak a ni, tiin, “Mi khawsak harsa ber pawhin inenkawlna an mamawh ang an hmuh theihna tura health care scheme changtlung tak neih a pawimawh,” a ti.
Meeting buatsaih chuan hmarchhak state-a sawrkar laipui health care scheme AB PM-JAY kalpui danah hmasawnna a thlen ngei a beisei tih a sawi a. Sawrkar laipuiin health care scheme a kalpui hma kum engemawzat raltaah Mizorama hman tur state health care scheme ruahman a ni, tiin, sum tam tak dah theih a nih loh avang leh chhan dang dang vangin a nih tur anga an kalpui theih loh dan te, kum 2018 tawp atang khan tharthawhin, tunah chuan sawrkar laipui scheme nen kalkawp tira tichangtlungin, huamzau zawka buatsaih zel tum a ni tih a sawi.
Thutkhawm hi National Health Authority (NHA) bultum a ni a. NHA hi Ministry of Health & Family Welfare-in health care scheme flagship programme a siam – Ayushman Bharat Pradhan Mantri Jan Arogya Yojana (AB PM-JAY) kalpui tura ruat a ni. Hmarchhak state tin atangin an aiawhte an kalkhawm a ni.
NHA CEO S. Gopalakrishnan chuan he scheme hi mipui a tam thei ang berin an hman tangkai a, a mamawhtuten enkawlna tha an hmuh bakah mahni inenkawl tha an hriat theihna’n state tinin thahnemngai taka hma la turin a chah.
NHA addl. CEO-in presentation a pek danin, hmarchhak state 8 zingah Assam chuan AB PMJAY beneficiary 3003069 neiin a tam ber a, Sikkim-in 44228 neiin a tlem ber. Mizoramah chuan beneficiary 216584 an awm a ni. Assam, Meghalaya leh Nagaland chuan PM-JAY hi state health care scheme nen thlunzawmin an kalpui a. Sikkim leh Tripura chuan state health care scheme hran an kalpui lo.
AB PM-JAY sum hman dan chungchangah leh state tin AB PMJAY hmalakna leh dinhmun sawi a ni a. Vawiin – March 17 hian thutkhawm chhunzawm a ni ang.