Mamit DEF-in kum 25 tlin lawm

Mamit DEF-in kum 25 tlin lawm
Mamit District Executive Force (DEF) chuan Ningani khan an kum 25 tlin, Silver Jubilee an lawm a. Director general of police Devesh Chandra Srivastva chuan a hmanpui.
DGP chuan Mamit DEF-in Silver Jubilee an hmang thei chu lawmawm a tih thu a sawi a. Mamit district chu international border leh inter state border nei a nih angin, police an pawimawh zual a. Remna leh muanna a awm theihna’n an hnaah theihtawp chhuah turin a chah a. An district-in hma a sawn theihna’n remna leh muanna kengkawh chunga hma la turin district bawrhsap leh SP te a chah bawk.
Mizoramah hmeichhe tam takin police an zawm chu lawmawm a tih thu a sawi a. Police station-a Women Helpline chuan nunaute laka rikrapna thleng thin a tih tlem a beisei tih sawiin, police chu dan leh thupek kengkawhtu an nih angin, misual hrem kawngah an duhdana dan kengkawh mai lo turin a chah.
Ruihhlo ngaite chu criminal anga en loin, victim anga theihtawpa tanpui turin DGP chuan a chah a. Ruihhlo zuartute erawh an theihna zawng zawng bakah khawtlang hruaitute nen tangtlanga jail-a dah an nih ngei theihna’n hma la tura chahin, mipui himna atana thawk leh hlawh pek an nih ang ngeia thawk a, police zahawmna vawnghimtu ni turin a chah a ni.
Mamit SP office hi 1998 March 11-a din a ni a, hemi kum April 27-ah function tanin, LT Hrangchal, IPS (Rtd) chu SP hmasa ber a ni. Tunah hian Lalthangpuii Pulamte, MPS chu SP a ni a, SP office hnuaiah hian police sub-division 3, police station 5, outpost 1 leh border outpost 10 a awm a ni.