Health department-a hna 7 lak tawh cancel turin ngen

Health department-a hna 7
lak tawh cancel turin ngen
Health department National Health Mission hnuaia hna pasarih lakah advertisement leh dan tlawhchhan awm mumal loa lak a awm niin Mizo Zirlai Pawl chuan an sawi a. 2025 June 10 hmaa cancel leh turin sawrkar a ngen.
MZP Gen. Hqrs thuchhuah danin, Health department-a hnalakah advertisement chhuah loa duhsak zawng lak an awm tih thuthang chu a chhui a. National Health Mission hnuaia post 7 – laboratory technician 3, staff nurse 2, assistant data manager 1 leh executive assistant 1 chu advertisement tel loa lak an ni tih a sawi.
‘DP&AR (ARW) office memorandum – guidelines for engagement of co-terminus (contract or provisional or otherwise) employees under Centrally Sponsored Scheme/ Central Sector Scheme/ Externally Aided Projects etc 2021 tlawhchhan loa lak a nih avangin, duhsak zawngte thunnaah kan ngai a ni,’ a ti.
NHM hnuaia dan dik taka hna lak chu an website-ah awlsam taka en leh hmuh theih a nih hlawm laiin, heng an sawi tak hna hi tarlan a ni lo a. A ruk a rala lak tih a chiangah MZP chuan a ngai tih a sawi.
‘Thalai hna zawng mek kan intlansiak mup mup laiin, hetiang sawi a awm leh thin hi MZP chuan a la thutak in a haw takzet a. Inelna thianghlim tak karah thalai a thiam leh tling apiang lak thin nise a duh. Thalaite rilru tina leh ti hnual thei zawnga hmalakna hi engti kawng mahin a enliam dawn loa, Health department-in NHM hnuaia hna pasarih advertisement chhuah loa an lo lak tawh hi cancel nghal kan phut a ni,’ a ti.
Health department-a an ngenna hi June 10 thleng a ngaichang dawn a, awmzia a neih loh chuan hmalak zel dan tur an ngaihtuah dawn tih a sawi a ni.