‘Remna thuthlung hi kan thil neih \hat a ni’
1986 June ni 30-ah zalenna sualtu MNF te leh India sorkar an inrem a, June ni 30 chu Mizoram tan Remna Ni a ni. Kumin thlengin he ni hi hmun hrang hrangah hman a la ni a, MNF leh India sorkar inremna thuthlung chungchang phei chu politics-ah a ri kum tluan thin.
MNF leh India sorkar inremna kha India danpui-ah bilh luh a ni a, a bung leh chang chu a sawi nana hmangin, 371G tia sawi thin a ni.
Senior Advocate LH Lianhrima chuan MNF leh India sorkar inremna thuthlung kha tha a ti a, “371G hi kan tan a tha a, kan thil neih that a ni, a aia tha sawi tur kan nei hlei nem,” a ti.
Hemi a sawi hian “Kan phak tawkah, kan mil tawkah kan lawm thiam a ngai,” tih a sawi tel a, he inremna thuthlung, 371G tia sawi hi kum 40 liam taa mi, kum 40 kal taa an duan a ni tih hriat a ngaih thu a sawi.
“Khatih hun laia a tha ber, khatih hun laia kan chhuanvawrte’n theihtawp chhuaha an duan a ni a, chu chu inhumhalh nan kan hmang a. Khang lai khan a aia tha hi kan hre lo a, kan nei lo bawk a,” a ti.
Hemi chungchang hi a sawi zawm a, “Miin theihtawp chhuaha an duan lo duhkhawp loh hi a awl a. Kum 30 kum 40 hnuah kan thlir a, ‘Chu chu telh tur, chumi pawh telh tur a nia, chu chu an lo telh lo a,’ lo tih zung zung hi a dik lo. Hun a ral a, thil a lo inthlak a, thil tharte a lo chhuak a, thil a danglam tih hi hriat tur a nia. Kum 40 hnuah chu chu telh tur tih te chu, mi zawng zawngin kan thei ang chu,” a ti a, 1986 hma lama kan dinhmun mila duan a ni lo thei lo tih hriat a tul thu a sawi.
370G thatna a sawi pakhat chu, “Jammu & Kashmir-in 370 an nei a, anni chu an thai bosak mai a. Inremna thuthlung chu an nei ve ngei a, mahse temporary a ni. 371G chu permanent a ni a, Jammu & Kashmir ta ang mai mai kha a ni ve lo,” tih a ni.
“Remna leh muanna tluantling kan nei a, chu chu a hlu. 371G hi a hlu a ni. Inhumhalh nan kan hmang a, tuna kan indaidanna bang hi keimahni vekin kan thiat a nih loh chuan, indaidanna chu tha tak kan nei a ni,” a ti a, hnam dangin Mizoramah ram an nei thei lo ang tih te pawh keimahni zawk hian kan ngaih pawimawh a ngai tia thlir theih a nih thu a sawi.
“India constitution-a tribal humhalha tur awm sate pawh 371G hian a rawn nemnghet a ni. Kei chuan a duangtu, tha thawhtute, ngaihtuahna sengtute hi an fakawm ka ti,” tiin Senior Advocate LH Lianhrima chuan a sawi.