Healthcare bill tang nuai sing 6

Mizoram healthcare scheme hnuaia bill thehlut mi sing khat chuangte bill tang chu cheng nuai 63000 chuang a ni tawh.
Mizoram Health Care Scheme buaipuitu Health department hotute chhinchhiah danin, he health care policy kum chhut dan ang chuan kum 2020-2021 thleng kha chuan bill pekchhuah loh (pending) a awm loa, 2021-2022 atangin bill pending hi awm tanin, 2022-2023 chho ah bill pekchhuah loh hi a inhnawhkhawm tam zual ta a ni.
October 2020- September 2021 chhung khan medical bill thehlut 28650 awmin, an bill belhkhawm hi Rs. 76,84,90, 046 a ni. Hemi kum hian bill thehluh zinga hnawl (reject) 646, an sum bill Rs. 2,84,32,752 a awm chungin, record-a a lan danah chuan bill ang ang hi pekchhuah vek tho a ni.
October 2021 atanga 2022 March inkarah bill thehluh 12897 awmin, bill zat hi Rs. 34,18,06,713 a ni a. Bill thehluh atanga chhan hrang hrang vanga hnawl 372 awmin, heta an sum bill hi Rs. 2,08, 71,094 a ni a; bill 11398 pekchhuah tawh niin, heta sum pek hi Rs. 29,81, 65,415 a ni. Hemi kuma bill thehluh, pekchhuah loh 1499 awmin sum pekchhuah tur hi Rs. 4,36, 41,298 a ni.
2022 April leh 2023 March inkarah mi 15198 atangin an bill thehluh Rs. 47,86, 29,639 awmin, bill rfeject 318 te sum bill chu Rs. 1,79,85,483 a ni. Hemi kum ami hi bill pekchhuah ala awm lo.
2023 April atanga tuna kum kal mekah bill 3236 luh belh leh tawhin, an bill hi Rs. 11,66, 08,880 a ni a; bill reject 19 awmin sumah Rs. 11,91,547 a ni. Hei pawh hi pekchhuah an la awm lo a ni.
Hemi ang hian, kumin September 5 thleng khan bill thehlut 19933-te bill, a vaiin Rs. 63,88, 79,817 chu pek loh a la awm a ni.
Mizoram Health Care Scheme-ah hian tunah mi 26569 an inziaklut mek a. He scheme tihchangtlunna atan hian Asian Development Bank atangin sum puk tum a ni a, sum hi hmuh a nih chuan sawrkar laipui hnuaia health care scheme – ABPMJAY ne kalkawp tirin, mi pakhat tan cheng nuai 5 thleng bill theih turin ruahman a ngai dawn tih department hotute chuan an sawi a ni.
AB PM-JAY hi kum 2018 atanga Mizorama kalpui a nih hnu ah mi 101096-in an damdawi bill thehlut tawhin, hemia sum pek tur chu Rs. 84,40, 97,518 a tling tawh a ni.