Hero MotoCorp motorcycle thar tur Mavrick 440

Hero MotoCorp-in motorcycle an tlangzarh thar leh tur chu Harley-Davidson nena an thawhhona hnuaia an siam a ni a, Mavrick 440 tih a ni ang. He bike thar hi January ni 22-a Hero World event, Centre for Innovation and Technology, Jaipur a neih turah an tlangzarh dawn niin report a awm a, February thlaah chuan an hralh chhuak tan tawh ang. Mavrick 440 hi Harley-Davidson X440 nen a inzul viau dawn a, platform thuhmuna din tur a ni a, Hero-Harley collaboration kutchhuak hmasa ber tur a ni.
Hero MotoCorp hian Mavrick 440 hming hi an trademark fel thlap tawh a, hei vang hian an bike thar hming tur hi a chiang tawh a, hei bakah hian he platform a din tur tho, motorcycle dang tan hming pakhat an trademark leh tawh bawk a, Hurikan 440 tih a ni ve thung.
Hero MotoCorp-in a bike start lai video an tihchhuah atang chuan a ri hi Harley-Davidson X440 nen pawh a inang hle a, engine thuhmun, design hrang deuh a ni dawn niin a lang a, a man tur hi puan a la ni lo nain showroom-ah Rs 2,00,000 vel bawr a nih a rinawm. Mavrick 440 hian Royal Enfield 350 range leh Honda CB350 range a rawn el dawn a ni.