Heroin aia chak Fentanyl avanga buaina

Fentanyl chu synthetic opioid, heroin aia a let 50-a chak leh hlauhawm zawk a ni. Americans te chu Fentanyl avang hian an thi chum chum a, US chuan Fentanyl tite chhanchhuah nan overdose-reversing drug naxalone chu prescription awm lova hralh chhuah a phal hial a, chuti khawp chuan a bik takin US chhim lamah Fentanyl chuan hnuhma a nei der tawh a.
Fentanyl kaihhnawiha khaw lar zet mai chu Manzanillo a ni. Mexico a Pacific coast kama khua niin kum 1970 chho khan Hollywood actress nalh Bo Derek chuan Hollywood movie a siamah he beach-ah hian inthehthilin a larpui hle a. Tunah erawh drug cartel te inbeihna hmunpui a ni ta.
Manzanillo hi Mexico a lawngchawlhna lian ber awmna niin Latin America-a lawngchwlhna lun ber pathumna niin nikum chhung ringawt khan Maznillo tlawh bungraw phur lawng maktaduai 3.5 lai a awm.
Cargo chi tin rengin a paltlang a, chung zingah chuan chemicals te China leh India atanga phur luh ber te organised crime tena synthetic drugs fentanyl te ang siam nana an hman nasat ber te chu an tel. Heng avang hian Manzanillo lawng chawlhna chu Colima state a thisen chhuahna hmun ber a nih zui phah tawh bawk.
Kum 2022 khan Mexico khawthlang lam state hi Mexico puma per capita murder rate sanna ber niin Sinaloa leh Jalisco New Generation cartel te chuan thunun tu zawk nih tuma an beih mek a ni bawk.
“Tun hnai lawkah fentanyl siam nana hman pawimawh tak propionyl chloride kan man a, hengte hi Manzanillo-ah hian an lut reng reng a ni,” tiin he lawngchawlhna venghimtu Naval Commander chuan a sawi.
Kum 2021 atang khan Mexico sorkar chuan Navy te chu lawng chawlhna tin te eirukna tihtawp leh organised crime chhut mih nan enkawl turin a ruat tawh a.
Tunah chuan Manzanillo a hmun tin enthlak leh enfiah vek a ni tawh a, a bik takin chemical lama sumdawnnate chu enthlak uluk zual a ni a. Mahse, harsatna awm ta chu bawlhlo thenkhatte agrochemical leh pharmaceutical a hman theih danin a phal vek bawk si te chu a tam em em si a ni.
Hei vang hian heng chemical te hi a nihna tur ang a ni em, paperwork-a inziak nena a inmil chiah em, tih te enfiah vek ngai a ni ta a, chu chu a hautak em em bawk a. Chung hrefiah tur chuan Belfian shepherd ui te hman hial an ni a, heng uite hi fentanyl pill emaw powder an hnim atanga hre thei tura enkawl te an ni.
Tun hnai lawkah Mexico’s president, Andres Manuel Lopez Obrador chuan Mexico-in fentanyl a siam lova a hmang hek lo tiin a sawi a. Mahse, tun hnaiah vek Mexico City leh hmar lama Nuevo Leon leh Sainaloa ah te ‘laboratory’ siam chawp tihchhiat a ni hlawm thung.
Baja California a law enforcement te chuan nikum khan Tijuana khawpuiah fentanyl siamna hmun pahnih luhchhuahin an tichhia a, chutah chuan fentanyl pill leh powder bakah tablet siamna hydraulic press-te an man a ni.
Tijuana hi US ramri hrul maia awm niin fentanyl trafficking nana ‘ground zero’ tih a ni a, heta tang hian California lamah thawn luh thin nia sawi a ni.
Fentanyl hi a hlauhawm hle a, tlemte pawhin mihring nunna a la thei a, hei vang hian fentanyl ngai zingah pawh nunna chan an tam phah zual a. Fentanyl overdose te chhanchhuah nan medicated spray naxalone chu tha ber riha ngaih a ni bawk a.
Kum 2022 khan mexican Red Crosss te chuan Tijuana bikah ringawt thla tinin drug overdose 60 an dawn thu sawiin heng mite hi fentanyl addict te an ni vek bawk a. Statistics mumalin a awm lo zawk a, nunna chan tam ber te pawh fentanyl kaihhnawih an nih a rinawm zawk an ti bawk.
Tijuana kawtthler thununtu nih tumin cartel te chu an hmanhlel bawk a, he drug hlauhawm hralha thununtu zawk nih tumna chuan thisen chhuahna nasa tak a thlen zui bawk a. January thla chhung ringawt khan mipui maktaduai hnih vel chenna Tijuanaah tualthahna 156 a thleng.
Fentanyl hralh chu a hlawk a, heroin siam chhuahna man aia tlem fea siam chhuah theih a ni bawk a. Hei vang hian drug cartel te chuan Mexico-a thingtlang hmuna poppy chintir an mamawh tawh lo, chemical Fentanyl siamna neiha fentanyl siam dan thiam chu an mamawh zawk a ni a. A chak em avangin US a thawnluh meuh chuan a man pawh a let 10-in a pung tawh thin.
Nikum khan fentanyl kaihhnawiha overdose-a thi American 70,000 chuang an awm anga chhut a ni a, US-a thawnluh thin fentanyl tam berte hi California ramriah lo danchah thin a ni thung.