Heroin leh ruihhlo dang man hnem

Heroin leh ruihhlo dang man hnem
Mizoram Police chuan March 25-31 inkar khan ruihhlo engemawzat an man.
March 31 zan dar 8.00 khan Aizawl District Special Branch (DSB) team chuan Zemabawk Tawngtaimualah Thanglianmung (26) leh Manglianthang (23) Thinglei, Tiddim district Myanmar ve ve hnen atangin heroin hawng 9 (gram 104) an man a. Bawngkawn Police Station-ah thubuai ziahluh a ni.
March 29 khan Saitual Police Special Team chuan Manipur atanga Aizawl pan mek Grand i10 car AR 01 G-9023 chu Keifang daiah tidingin an dapnaah heroin gram 242.79 (hawng 20) an man a, car khalhtu Md Eliyach Hussain (46) Barpeta district Assam chu manin Saitual PS-ah thubuai ziahluh a ni.
March 28 khan Saitual Police Special Team chuan Manipur atanga Aizawl pan Kia Seltos car AS 01 EP -1751 chu Keifang daiah lo tidingin an dap a, heroin kg 1.927 (hawng 177) manin, car-a chuang mi pahnih – Mangminlun (26) Churachandpur North Manipur leh Ginlemlal (24) Tuilumjang, Churachandpur district an man. Saitual PS-ah thubuai ziahluh a ni.
March 27 zing dar 1.00 khan Saitual Police chuan Keifang dai, Kualmawiah Manipur atanga Aizawl pana kal lirthei pakhat, Bolero Neo MZ 01 AD 6552 Zamchinlam (27) Changlei, Churachandpur district Manipur leh a mi phurh Dothanglen (36) Songpi, Churachandpur district Manipur chuanna an dap a. Lirtheiah hian heroin hawng 200, kg. 2.298 a rit an man. Saitual PS-ah thubuai ziahluh a ni.
March 25 zing dar 9.00 khan CID (SB) Operation Team chuan truck MZ 01 F 8402, Seling lam atanga Aizawl pana kal chu Tuirial lei bulah check-in, uluk taka endik a nih hnuah methamphetamine mum (Yaba) kg. 19.836 a rit chu motor headliner chhunga chamber siamchawpa thuhruk man a ni a. Hei bakah hian SIG SAUER pistol pakhat (P320SP model, serial no. 58C159642, Newington NH USA), a mu (9mm) 40 leh a magazine pahnih pawh hmuh chhuaha man a ni. A khalhtu Lalhnehzova (23) Vengsang Zokhawthar, Champhai District chu man niin Special Narcotics PS-ah thubuai ziahluh a ni.