Hezbollah commander pawimawh tihlum

Lebanese group Hezbollah te chuan an commander pawimawh tak pakhat chu southern Lebanon ah missile hmanga tihhlumin a awm tiin an sawi a, Israel tih ni ngeia ngaih a ni.
Wissam Tawil chu Hezbollah elite Radwan Force member niin tun buaina kaihhnawiha Hezbollah nunna chan zinga langsar ber a ni.
Israel sipaite chuan engmah sawi an la nei duh lo va, mahse, cross-border attack an chhan letna lamah Hezbollah target erawh an bei tiin an sawi.
Gaza buaina hian helai region a hnuk lut ang tih hlauhna a lian hle a. Hezbollah te hi Iran thlawp niin Lebanon a sipai lam leh politics lama thiltithei tak an ni a. Israel, UK, US leh khawthlang ram hrang hrang tena firfiak pawla an puan an ni thung.
7 October 2023 a Gaza Strip a indona tan a nih atangin Hezbollah leh Israel sipaite chu ramri hnaihah ni tin deuhthaw an inkap reng tawh bawk.
Israel prime minister pawhin Lebanon nena ramri hnaiha sipai awm te chu security tha a awm theih nana theihtawpa hma la turin a hrilh bawk a.
Lebanon state-run National news Agency report chuan Israel sipaite chuan Khirbet Selim a al-Dabsha area a car tlan lai chu missile hmangin an kap a, mi pahnih an thi tiin a puang a.
Missile vang hian vehicle chu kawng atanga tlan liamin a alh zui tiin a puang bawk a. Lebanese security source chuan vehicle-a chuang nunna chan zinga pakhat chu Wissam Tawil niin pakhat zawk pawh Hezbollah fighter tho a ti a ni.
Tawil hi Hezbollah sipai tha Radwan Force deputy head niin south Lebanon bik chu Tawil hian a enkawl tia sawi a ni bawk.
A hnuah Hezbollah te pawhin thuchhuah siamin Tawil chu a thih thu sawiin mahse Israel air strike avanga thi a ni an ti duh lo thunga ‘Jerusalem a pan laiin a martar’ tiin an sawi thung.
Thuchhuah an siam chuan Hezbollah-a Tawil nihna a sawi lo va, mahse, Hezbollah hotu lu ber Hassan Nasrallah nena an thlalak dun leh kum 2020 a US-in a tihhlum Iranian general Qasem Soleimani bula a thu lai an tilang thung a ni.
Hetih lai hian Israel sipaite chuan kar kalta tawp lam khan Hezbollah te military asset an tihchhiat nasat thu leh chu chu ramri hnaih atanga Radwan Force te umchhuah an tumna kal zel an ti bawk a. Hei hi Hezbollah tena Mount Meron a air traffic contol missile hmanga beia an tihchhiat chhan letna tia sawi a ni.
Kum 2006 khan Israel leh Hezbollah te chu thla khat indo tawhin chuta chhiatna nasa tak thleng chu Lebanese ten an la theihnghilh thei lo.
Lebanon-in economic crisis a tawk mek nen mipui nawlpuiin indona an hmachhawn duh lo nia sawi a ni bawk.