High Court-in dan loa kuhva ro tawlh chhui hna CBI kutah a dah

Myanmar atanga dan loa kuhva rah ro tawlh thin chhuichiang turin Gauhati High Court chuan Central Bureau of Investigation kuta hlan a remti.Social activist Vanramchhuangi chuan kum 2022 khan Gauhati High Court Aizawl Bench ah public interest litigation (PIL) thehlutin, Myanmar atanga Mizoram kaltlanga dan loa kuhva rah ro phurhluh hi Mizoram sawrkarin tih tawp a tum loa, tihtawp ahnekin central leh state GST thuneituten e-way bill dik lo siamin, heng kuhva rah tawlhtute hnen atang hian chhiah an laksak tih a thlen.
State sawrkar berin tihtawp tuma hma a lak loh avangin dan loa kuhva rah tawlh hi CBI-in chhui se, tiin court hi a ngen a ni.
Hei bakah hian dan loa kuhva rah tawlh hian tualchhunga kuhva chingtute tan harsatna a siam a, an kuhva thar hralhna thlengin a tawrh phah tih a thlen bawk.
Court hian PIL thehluh kaihhnawiha state sawrkar hnuaia department leh sawrkar laipui hnuaia department-te insawifiahna leh chhanna an siam a zirchiannaah, Myanmar bul Champhai district atangin, a vaia belhkhawma kuhva rah cheng nuai za tam tak man hu phurhna atan e-way bill siam a nih thin laiin, Champhai district leh Khawzawl district-in tualchhung kuhva hralh turin tharchhuah an la nei lo hrim hrim tih court-a document/ affidavit thehluhah a lang lawi si a, e-way bill pek (issue) danah kuhva rah neitu address kimchang ziahlan a ni ngai loa, e-way bill chu mimal hminga pe loin registered firms hnena pek tur a nihna pawh bawhchhiat a ni tih a sawi a ni.
PIL thehluttu hian police hnenah pawh he thil hi chhuifiah sak turin a lo ngen tawh naa, ramdang atanga kuhva hi lakluh a nih avangin state police thuneihna chin bak a nih avangin an tan chhui a har a, GST lem, chhiah lak dan dik lo leh hemi kaihhnawih document dik lo tih lam chu Central Board of Indirect Taxes and Custom lam chan tur nia a lan thu Mizoram sawrkar hian court hi a hrilh a ni.
Ramdang atanga kuihva rah tawlh dan hi chhuichian ngei ngai nia a lan laiin, state police-in chhui tha duh lo emaw, an thuneihna bak nia an sawi emaw te ngaihtuahin leh, ram dang atanga rawn intan a nih avangte, Mizoram sawrkarin CBI hnenah ‘consent’ a lo pek tawhte thlir telin, CBI-in kuhva rah tawlh dan hi chhui mai se, tiin Gauhati High Court hian thu a ti tlu a ni.