Hindi thiam hi a tulin a tul – Chief minister
Hindi thiam hi a tulin a tul
– Chief minister
Hindi thiam chu a tulin a tul tawh a, Mizo taka thiam turin thalaite a fuih tih chief minister Lalduhoma chuan a sawi.
Mizoram Hindi Prachar Sabha bultumin Thawhtanni khan Aizawlah Hindi Diwas Day hman a ni a. Hmanpuitu chief minister chuan, Hindi thiam chu a tha a ni satliah loa, a tulin a tul tawh zawk tih a sawi a. Chutihrualin, Hindi kan thiam vang emaw thiam kan duh vang emawa an hnam zia entawn kher a tul lem lo, tiin, “Mizo takin Hindi tawng thiam ila, an hla sa ang u. Chutianga kan tih loh chuan kan hnamzia kan hloh tial tial anga, kan sakhua thlengin min hliau thei. Kan tawng leh culture hi tiral loin kan tilian zel zawk tur a ni,” a ti.
Sawrkar laipuiin Hindi a uar tial tial a, Hindi thiam lo tan chuan an duh leh duh loh thil an sawi chhuak thei lo fo a. Mifel tak pawh a fel tih a hriat theih loh thin a. Chuvangin Hindi chu thangtharten rawn thlahthlam lo turin a chah tih a sawi.
MP a nih laia Mizorama Hindi zirna-in hma a sawn theihna tura hma a lakna zarah kum 1988-ah Mizoramah Hindi pawl 10 (matric) leh PU (intermediate) exam phalna (recognition) central-in a pe a. A hnu lawk, kum 2000 khan BA exam phalna a rawn pe leh tih Lalduhoma hian a sawi a ni.
“Tunah chuan Hindi thiam kan lo ngah ve tawh hle a, primary leh middle school-a Hindi zirtirtute chu Mizoram Hindi Prachar Sabha chherchhuah an lo ni deuh vek tawh a; Mizoram Hindi College-a thawktute chu Mizo nula leh tlangval an ni deuh vek bawk a, Hindi doctorate degree nei pawh 20 chuang kan lo nei ta a. Kan hmathlir kha a takin a rawn chang chho zel a ni,” a ti.
Hmanpuitu dang Education minister Dr Vanlalthlana pawhin, Education Reforms Committee chuan Hindi Speaking Day hman tha tiin, thla khatah ni khat talin bul tan an rel tih a sawi a. Hindi thiam chu hnamdangte nena kan inpawhna leh kan eizawnna atana thil tul a ni tih a sawi. Hindi subject-a PhD neite lawmpuiin Mizoramin Hindi PhD 20 chuang a nei tawh a, a neih belh zel a ring, tiin, Mizoram Hindi Prachar Sabha-in Aizawl Traffic Police-te Hindi spoken course a lo pe chu lawmawm a tih thu a sawi a. Taxi driver-te pawhin a tlanglawn chu thiam se a that hle a ring tih a sawi bawk.