HIV-ah awareness nei tha zawm tha lo angin kan lang

On Aug 13, 2025 4 0

HIV inkai darh chungchangah a hlauhawm dan leh inven theih dan inhrilh tha viau, zawm tha si lo angin Mizoram kan lang mek tih chief minister Lalduhoma chuan a sawi. Intensified IEC Campaign on HIV thawh hnihna leh HIV Test Drive Campaign 2025 chu Thawhlehni khan chief minister hian a hawng a. HIV chu kai tawh chuan a tihdamna a awm loa, a laka himna awmchhun chu inven chauh a ni tih a sawi. Inveng thiam tur chuan a chungchang kan hriat a ngai a, uar taka inzirtir a tul, tiin, he natna hi hmun tinah a awm tawh avangin thingtlang leh hmun kilkhawr zawk thleng phak ngeia hma lak a ngai tih a sawi a ni.
“Mizoram hi HIV/AIDS inven dan awareness nei tha pawl tak nia tarlan kan ni a. HIV kai kan tam viau lawi si. Awareness nei tha, zawm tha si lo state angin kan lang mek. Hmalakna awmze nei, zawm hlawh lehzual awareness kan ngaihtuah chhuah a tul,” a ti.
HIV test-na hmun ICTC-a counsellor-te sawi danin, HIV kai hmuh chhuahte hian HIV kai dan leh invenna kawng an hre deuh vek an ti lehzel tih chief minister hian a sawi a. An kai palh thei a ni tih hrereng chunga invenna an hmang duh tlat lo lai chu kan mutan, ‘change’ kan mamawhna lai a ni gtih a sawi.
Intensified IEC campaign neihna tur khawtlang hruaitute chu thawktute lo thawhpui turin a sawm a. YMA hruaitute pawh khawhar inah, YMA programme-ah tam zawka sawi turin a ngen tih a sawi bawk.
8 2024- 2025 sawrkar kum chhunga Mizorama HIV kai hmuh chhuah 68.13% chu inpawlna atanga kai an ni a. Ruihhlo tithin, inchiuna atanga kai 29.25% an ni. Heti a nih chuan HIV darhna bul 97.38% hi inpawlna leh ruihhlo vang a ni.
8 Kum 2024- 2025 chhunga kai thar mi 2471 niin an zinga 1602 hi mipa an ni a, hmeichhia 869 an awm a, an zinga 140 hi raipuar an ni.
8 Kum 1990 atanga vawiin thlenga Mizorama HIV kai tawh mi 32994 an awm a. Mizoram chu India rama HIV/AIDS venna leh enkawlna lam thawk tha ber 5 na a ni mek.
8 Intensified IEC campaign chhung hian district 11-a khaw 88 tuam chhuah a ni anga, a tam thei ang ber test neih hman tum a ni.