HIV kai leh thihpui tlahniam nasa

HIV kai leh thihpui tlahniam nasa
HIV (human immunodeficiency virus) laka khawvelin beihpui a thlak chuan rah tha chhuahin a kai thar chu 22% zeta tlahniamin HIV kaihhnawiha thihna pawh 40% zetin a tlahniam.
Thawhtannia The Lancet-in HIV journal a tihchhuahah beihpui thlakin hlawhtlinna hmel hmu mah se tuna a kal dan hian UNAIDS 2030-in thlen tum (target) a neih chu a phak dawn chuang lo niin an sawi.
Thil tha lam karah hian zir chianna chuan kum 2030-a AIDS kaihhnawih thihna thleng thin 90%-a tihhniam tum chu phak a nih hmel loh niin a tar lang a. Kum 2039-ah chuan HIV vei hi mi maktduai 44.4 awmin an tam lai ber a ni ang a, a hniam zawnga kal zuiin 2050-ah chuan maktaduai 43.4-ah a tla dawn niin an sawi. 
Zir chianna chuan HIV hi ram tam takah thihna thlentu lian ber a la tling niin a tar lang a. A lungchhiatthlak lai ber chu tuna vei mek maktaduai 40 vel zinga hmun lia thena hmun khat chauhvin enkawlna tha an dawng chu a nih thu an sawi bawk.
Sustainable Development Goals 3.3 chuan HIV darh zelin vantlang hriselna a tihderthawng chu kum 2030 a tihtawp a tum a. “Tuna a kal zel dan en erawh hi chuan ram 204 zeta zir chiannah he thil hi chu a theih hmel loh va, theihtawpa tan lak zel a la ngai a ni,” tiin an tar lang.
Khawvel puma HIV vei thar leh thihpui an tlem ta hi sub-Saharan Africa an tih hmuna a tlakhniam nasat vang a ni a, heng hmunah hian a vanglai, kum 1995 atanga chhutin 60% zetin a tlahniam a ni.
Hetih ai hian HIV kai thar hi Europe laili leh chhak lam leh Asia lailiah an pung hle a, kum 1995 atanga chhutin 2021-ah chuan 586.4% zetin an pung a thung.