Israeli-in Hezbollah nena inkahhai rawtna pawm dawn?

Israeli-in Hezbollah nena inkahhai rawtna pawm dawn?
Israeli sorkat chuan Lebanese hel pawl, Hezbollah nena inkahhai rawtna chu a pawm dawn niin sawi a ni a, finfiahna erawh a la awm lo.
Israel hian Thawhlehnia an security cabinet thutkhawmah an thian hnai ber, United States leh France ten ruahmanna an siam chu an pawm dawn niin mi thenkhatin an sawi a, a sawitu erawh a hming tar lan a ni lo.
Inkahhai puanna tur ruahmanna hi pawm a nih chuan thla 14 zet an lo inbeih tawhna, mi sang chuang an thihna chu a tawp lailawk dawn tihna a ni a. Hetih lai hian Thawhlehni thleng khan an la inkap nasa hle zel.
Thuneitute chuan cabinet meeting hi Prime Minister Benjamin Netanyahu-a’n kaihhruaiin Thawhlehni zanah neih a ni dawn tih an sawi.
New York-a Israel UN palai, Danny Danon chuan hemi chungchang an zawhnaah ‘hmalam panin an kal’ tih a sawi a, cabinet-in a pawmpui ngei dawn nia ngaih phahtu an tam hle.
Hemi hma hian Lebanese thuneitu sang pakhat chuan inkahhai puanna tur hi US President Joe Biden leh French President Emmanuel Macron te duan a ni tih Reuters a lo hrilh tawh.
Lebanon Deputy Parliament Speaker Elias Bou Saab chuan Beirut-ah chuan Hezbollah hian an thawhpui, Parliament Speaker Nabih Berri nen an inbiak hnuah inkahhai hi an pawm tawh tih a sawi.
French president pisa pawhin inkahhai puang ngei tur hian kawng dik zawh zel a ni tih a sawi a. “Kan hnaih tawh hle a; mahse, engmah tihfel tak tak erawh a la awm lo,” tiin White House national security spokesperson John Kirby chuan Thawhtanni zan khan Washington-ah a sawi.
Lebanese Foreign Minister Abdallah Bou Habib chuan Thawhlehni zanah chuan inremna siam a nih ngei a beisei thu a sawi ve bawk.