HIV hrik paiten an taksa tihchakna atana damdawi an ei thin Antiretroviral Therapy (ART) damdawi chatlak vangin hmarchhak state-a awm he damdawi ei mekten harsatna an tawk ni angin tunhnaiah national paper pakhatin a ziah chu thu dik lo a ni tih Mizoram State AIDS Control Society (MSACS) chuan a sawi.
MSACS hotute sawi danin, Mizoramah hian ART damdawi – Abacavir leh Lamivudine chawhpawlh AL-Adult damdawi ei lai HIV kai zingah 76 an awm a. He damdawi hi chawhpawlh (Regimen) thar, TLD ei thei lo te hnenah chauh pek a ni. Mizoramin AL-Adult damdawi hi a tlachham loa, naupang eitur puitlinga pek an ni hek lo. Damdawi hi a ei te hi an taksa dinhmun enin an ei tur zat chhut thin a ni a, chumi mil chuan pek an ni. Tunah hian Mizoramin AL-Adult damdawi thla khat ei aia tam a nei a, ATV/r damdawi pawh ART Centre hrang hrangah thla 6 aia tam tla a la awm a ni.
Assam SACS-in an tualchhung suma AL-A a lei mum 7500 vel chu Maharastra atangin rawn thawn chhuah a ni tawh a; central atanga AL-A supply pawh CMSS atangin tun thla laihawl vela a thlen dawn bakah a nghah chhunga harsatna awm palh thei sukiang turin MSACS chuan AL-A damdawi hi Deccember 2022 khan NACO-in state hnena sum a pek sa hmanga lei lawk a ni tih an sawi.
‘Bungrua/ damdawi a hun taka a lo thlen theih nan MSACS hian Supply Chain Management Committee a din a, indaih loh hlauhthawnawm a awm chuan Committee hian a chingfel thuai thin. ARV damdawi awm zat hi state leh ART Centre tinah enfel reng a ni a. ARV damdawi thawnchhuah leh semrual chungchang pawh SACS leh Supply Chain Management, NACO nen hunbi neia inrawn thin a ni a, stock dinhmun thlir ho a ni,’ an ti.
HIV kaite damdawi a chatlak lo – MSACS
Get real time updates directly on you device, subscribe now.