Ni zung chakna hman tangkai dan phochhuak

Ni zung chakna hman tangkai dan leh hnathawh a tih awlsam theih dan entirna – Mizoram Trade Facilitation Fair chu Ningani khan Aizawlah neih tan a ni.
Ni zung chakna hman tangkainaah hian puanthui khawl, eitur vawnthatna khawl, buh her khawl, artui awp keuna, buhpawl chansawmna, la herna khawl, hmunphiah siamna khawl, agarbati siamna khawl leh khawl dang engemawzat phochhuah a ni a. Famrmer producers organisation leh self help group-in an siamte phochhuah niin, financial institution, sawrkar department, tlawmngai pawl, sumdawng, incubator-te leh Mizoram bakah hmarchhak puma zawrhsuma chantirtute an tel a ni.
Trade Fair hawngtu Commerce & Industries minister Dr R Lalthangliana chuan ni zung chakna chu Pathian thilpek, hnianghnar taka kan neih a ni tiin, trade fair-a an khawl phochhuah chu awlsam taka hman theih tura duan an ni tih a sawi.
Mizoram chhung leh pawn atangin private company hrang hrang leh tualchhung mimal khawl siamte phochhuah a ni a, khawl hrang hrang hnathawh dan entir an nih bakah sawihona hun siam a ni.
Trade Fair hi SELCO Foundation bultuma neih a ni a, Atal Incubation Centre- SELCO Foundation, Planning & Programme Implementation Department, NorthEast Initiative Development Agency leh Mizoram Science, Technology and Innovation Council te nen tanghoa neih a ni.
SELCO Foundation director Huda Jaffer chuan Trade Fair hi hriatna leh hmalakna bul tanna a nih an beisei tih sawiin, “Thawh hona tha leh inpekna hmangin Mizoram hian ram pum huap ei leh bara intodelhna lamah tum nghet tak leh ruahmanna fel tak kan nei dawn a ni,” a ti.