HIV kaiten ART lak hmaa an in test na man chawi dawn tawh lo

HIV kaiten an ei thin ART damdawi an lak hmaa test chi hrang hrang tih hmasak nana sum an chawi thin chu sawrkarin chawi ngai loin a tih sak tawh dawn tih chief minister Lalduhoma chuan a sawi. HIV leh inpawlna atanga inkaichhawn natna, STI (Sexually Transmitted Infection) chungchang mipui hnena zirtirna beihpui thlak – Intensified IEC Campaign- India Fight Against HIV & STI Mizorama kalpui tur chu chief minister hian Nilaini khan a hawng a. He campaign hi kumin September leh October chhung kalpui a ni ang.
HIV kan do hneh thuai theih nan a kai mek hmuh chhuah zung zung a ngai a, inringhlel an awm chuan rang taka in-test turin a sawm a. HIV kai hmuhchhuahte chu khawsak harsa tak tak an tam avangin an damdawi ei thin ART (Antiretroviral therapy) an lak hmaa test chi hrang hrang – base line investigation man chawia tih ngai thin chu man chawi loin sawrkarin a tihsak tawh dawn tih a puang a ni.
NACO chhut danin Mizorama puitling zaa 2.73 chu HIV kai thei dinhmuna ding mekah min ngai tih chief minister hian sawiin, “Kan dinhmun a him lo hle. Tan tlan a ngai a, kohhran, tlawmngai pawl, association leh mimal tin hma lakpuiah ka sawm a ni,” a ti bawk.
Tuna campaign hian khawtina chhungkaw tin hnen thleng phak se a duh tih sawiin, DC leh a thawhpuite pawh tha taka hma lo la turin a ngen tih a sawi a ni.
Health minister Lalrinpuii chuan ruihhloin min run nasa a, a inchiu zingah middle school zirlaite pawh an awm tih hmuh chhuah a ni tih a sawi. Khuh damdawi hralh a kal viau nia sawi a nih thu a sawi bawk.
“Kan dinhmun chhiat zia hi hriaa mitinin kan do a ngai a, he campaign hi mipuiin lo ngaihven se kan duh hle. In tin leh khawtin thleng phak campaign neih kan tum a. State Council on AIDS tuaithar lehin MLA zawng zawng pawh he hmalaknaa hman tangkai kan tum a, kohhran leh tlawmngai pawlte nasa zawka thawhpui kan tum a ni,” a ti.
Miin HIV a kai tih a inhriatchhuah ran a, ART damdawi tha taka a lak bawk chuan rei tak a dam zui thei.
HIV leh STI hi nunphung vanga natna ve ve a ni a. HIV bik hi vanduai vanga kai theih a nih rualin, chutianga kai chu an tam loa, Mizorama kai zaa 60 chu condom tel loa inpawlna vang a ni a, a dang zaa 30 chu ruihhlo ti, inchiuna hriau inhmantawm atanga kai an ni.
Tunah MSACS hian HIV kai 16217 vel a enkawl mek a, HIV kai hmuh chhuah, an chin hriat zui si loh 633 an awm. HIV kai hriatchhuah tawh, ART la loa an chin hriat zui lohte chu an hnaih ber ART Centre pan turin a ngen.
Nu, HIV kaiin nau a hrinin, enkawlna tha tak dawng chunga nau a pai chuan a fa a him thei a. Nikum chhung pawh khan Mizoramah chutiang naupiang 120 zinga 118 chu HIV lakah an fihlim.
NACO-in state zawng zawnga din tura 2007-a a din, HIV/AIDS chungchanga state-a thuneitu sang ber – State Council on AIDS chu kumin August 19 khan chief minister chairman-na hnuaiah Mizorama a vawi khatna atan an thukhawm.
HIV kai mek, midangten an kai chhawng ve ang tih hlaua hna thawk a, a kai ve dangte theihtawp chhuaha enkawl thinte inpekna chhuanawm tiin, an chungah lawmthu a sawi.