HIV+ vangin mi 2900 chuangin nunna chan tawh
Mizoramah HIV+ a hluar a, Mizoram hi mihring tam lam atanga chhuta he hri hluarna state a ni. Tun hnai kum nga vel chhungin he hri vei hriatchhuah thar thahnem tak an awm a, mi 2900 chuangin he hri vang hian nunna an chan bawk.
2020 hnuah, 2025 July thla thlengin Mizoramah mi 2996-in HIV+ vangin nunna an chan a, kuminah pawh January ni 1 atanga July thla thleng khan mi 295-in nunna an chan.
2020 hnuah he hri vanga nunna chan an tam ber kum chu 2023 kha a ni a, mi 632 an ni. A hma kum 2022-ah khan mi 562-in nunna an chan a, a dawt chiah 2024-ah mi 561-in nunna an chan.
Tun hnai, 2020-21 atanga 2025-26 (July thleng) thleng khan HIV+ mi 11,032 hriatchhuah an ni a, vawiin thlenga Mizorama HIV+ awm zat chu mi 19,837 an ni. Mizorama HIV+ awm mek zinga a tam zawk chu 2020-21 hnua hriatchhuah an ni a, hemi hma lama hriatchhuah, tuna HIV+ awm mek zinga mi chu mi 8805 an ni.
HIV+ awm mekah hian a tam ber chu Aizawl district-a mi an ni a, Champhai district, Kolasib district leh Lunglei district te’n an dawt. An tlem berna Hnahthial district-ah chuan mi 284 an awm.
HIV+ boral zat
2020-ah 521
2021-ah 425
2022-ah 562
2023-ah 632
2024-ah 561
2025-ah 295
(Jul thleng)
Total 2996