Hliam vanga chawl rih tur Martinez leh Lindelof

Manchester United defender pawimawh pahnih Lisandro Martinez leh Victor Lindelof-te chu hliam vangin a lo berah thlakhat an chawl dawn.
Kephah leh khup hliam avanga season kal laia Premier League game kua chiah la khel tling Martinez hi chawlhkar sarih zet khup hliam avanga inelna a hmachhawn theih loh hnuah karliamta Inrinni khan khelmualah a kir a, Brentford khelmualah a team United chuan hnehna chang zo loin 1-1 draw an hlawhchhuak thei hram a; a hnu lawkah training laiin a chawn tihrawl a tina leh a, a chawlh chhunzawm leh a ngai dawn a ni.
Brentford game-a inlan dang Lindelof pawhin kartawp inkhelah khan a kaihza tha a tina a, Martinez chuan a thlak a, an pahnih hian thlakhat chu an chawlh hrim hrim a ngai dawn a, thlakhat hnu lama an hmasawn dan azirin khelmual an luh leh hun tur a hriat theih chauh ang.
Martinez leh Lindelof hi tun season-a an kirleh hman rinawm tho bawk mah se thlakhat zet an chawlh a ngaih dawn avangin zanina Chelsea an luhkhung tur game a\anga chhiar \anin Premier League game nga zet an khel thei dawn lo a, leage match heti zat bakah hian FA Cup semi-final lamah pawh an tel loin Old Trafford club-in Coventry an sut a la ngai cheu dawn.
Manchester United boss Erik ten Hag hian hliam avang bawkin a left-back pahnih Luke Shaw leh Tyrell Malacia-te pawh a chhawr thei lo mek a, defender dang pahnih an bawksawp leh tak avang hian thlarhnung lamah harsatnain a tlakbuak mek a ni.
United hian Premier League table-ah parukna daih luahi, top four an thlen phak lohna pawh point 11 zet a ni tawh.