Top Iran chess player Sara Khadem chu tunhnai khan BBC-ah Razia Iqbal chuan a interview a, he hunah hian hmaikhuhna (headscarf) a hman duh loh vanga Iran a tlanchhuahsan thu a sawi.
Khawvel hmeichhe chess player zinga hmalam hun nei eng berte zinga mi Sara Khadem hi tunah kum 25 mi niin, Islam sakhaw dan firfiak zawm chunga ram rorelna kalpui duhtu Iran sawrkar duhdan dodalin headscarf tel loa international tournament khelh a thlang a; Iran ramah hmeichhiate dikna humhalh tura nawrhna a kal vung laiin a thiltih tum bansan tura vauna a tawk a, a rilru a sawhsawn duh miau loh avangin an ram a luh ruala manna thupek an tichhuak a, hei vang hian Iran-a kir mai a tum lo.
-- Advertisement --
Tunah hian Spain ram chhim lama a tlanchhiatna hmunah a pasal leh a fapa kumkhat mi nen khawsa mekin, interview a hmachhawn tum hian amah leh a chhungkuate chuan BBC hnenah an chenna hmun chipchiar tarlang lo turin an ngen a, Iran atanga mel sang chuang daihah khawsa tawh mah se hlauhthawn an la nei reng.
Iran ramah chuan hmeichhiate hi vantlang hmuna hmai khuh vek tura tih an ni a, mahse, nikum September thlaa Iranian nula kum 22 mi Mahsa Amini thihna nghawng kal zela an ram chhunga dodalna kal zawmin mi tlemtein an sawrkar dan hi an zawm duh lo a, chu’ng zingah chuan chess player Sara Khadem-i bakah climber Elnaz Rekabi telin, ani hi a ngaihdan sawhsawn tura nawrluih niin, Iran-ah a kir tawh a, tuna a dinna dik tak hriat theih a ni ta rih lo.
Sara Khadem hian headscarf tel loa nikum December thla Kazakhstan ram tournament khelh a tum thu a puan rual khan Iran kawtthlerah chuan nu, nula leh hmeichhe naupangte’n an nunna thapin sawrkar dodalna an lantir tih a sawi a, ani lo tih ve chu a te tham hle niin a sawi.
Sara hi nikum December thla tawp lam khan Kazakhstan rama FIDE world chess tournament-ah hmaikhuhna tel loin a inlan ta ngei a, tarlan tawh ang khan, Iran sawrkar chuan manna tur thupek a tichhuak nghal a, an ram lama kir loin Spain-ah a tlanchhe zui ta a ni.
Spain rama amah leh a chhungkua an chen theih chhan hi golden visa rule an tih behchhanin a ni a, he danah hian chenna nei tura euro maktaduai chanve hu ‘property’ leite chu Spain rama khawsak phalsak an ni.
Spain Prime Minister Pedro Sanchez-a’n lenga a sawm boruak sawiin Sara Khadem chuan, “Kan ram lama min manna tur thupek an chhuah ni takin a ni a, ngaihtuahna a phir duh khawp mai.
“He ram hian min lo dawng-sawng duh a, hlawhtlinna tam tak ka sualchhuah ve tawhna ka ram mite pawhin min lawm ve tho bawk,” tiin.