Hmarcha rawt thleng leh lungtat leina thlengin sawrkar sum hmang – Lalruatkima

Assembly speaker-in sawrkar suma a bangla thuamna atana thil lei zingah hmarcha rawn thleng leh lungtat thlengin a tel tih MNF hruaitu Lalruatkima chuan a sawi.
Thawhtannia MNF office-a inkhawmah MNF treasurer Lalruatkima chuan, thla 9 chhungin Assembly speaker enkawlna atan a vaiin cheng nuai 65.23 hman a ni tawh nia sawiin, PWD atangin speaker bangla cheithatna atan nuai 8.4, bangla furnishing atan nuai 15 sen a nih bakah Assembly Secretariat sum hmangin speaker bangla furnishing atan Samsung/Sony TV engemawzat, hmunphiah, tooth pick, wall clock/solar sana 9, pressure cooker 11, hmarcha rawt thleng leh lungtat thlenga lei a ni tih RTI chhanna atanga dawn a ni tih a sawi.
Chhiatna hrang hrang kan tawh mek laiin chief minister ber USA-a a zin bo daih chu mak a tih thu leh PWD minister lah muthlu ang mai niin, a mawhphurhna a hlen zo lo tih Lalruatkima hian a sawi a. Kan kawngpui a that loh laiin ZPM sawrkar ve leh chief minister tualzawl chu PCC flooring-a cheithat a nih bakah PWD minister in bul, lirthei kal theih loh chu an sawrkar reilote chhungin a chenna ina lut thei turin sawrkar sum hmanga kawng siamsak a ni tih a sawi a ni.
“ZPM sawrkar Council of Minister thutkhawm hmasa berin ZMC leh Lengpui Airport hralh an tum a hlawhchham a. Ni 100 chhung hmalakna tur hmachhawp a hlawhchham a, hmunphiah lei a hlawhchham a; sum enkawl leh kawngpui enkawlah an hlawhchham a, chhiah tipung lo tura insawi siin an tipung a, NE state-ah Mizoram chu tuialhthei man sanna ber a ni ta bawk,” a ti.
MNF chu political party a ni mai loa, Mizoram leh hnam sakhua venghimtu – ‘Mizo Guardian’ a ni tih MNF treasurer hian a sawi a. Hnam pasaltha martar-te hniakhnung zuia kan ram leh sakhua venghimtu kan nihna hria in, beidawng mai tur an ni lo tih a sawi a ni.