Hmarchaah kum dang pha lo

A thak ngaiin a thak tho a, a rawng pawh a tai sen hlar tho. Chutiang lamah chuan kum dang an pha tho a, mahse thar tam lamah Thingsai leh a chhehvel khuate’n kum dang an pha lo tih thu dawn a ni.

Thingsai, Bualpui, Cherhlun, Ngharchhip, New Ngharchhip, Khawri, Tarpho, Aithur leh South Chawngtui vel hi hmarcha ngah khua an ni a, kumina an thar zat chiang taka hriat la ni rih lo mah se kum hmasa an pha lo tih an sawi.

January hi hmarchak lak hun a ni a, khawchhak lamah hmarcha hi an mal laiin Thingsai leh a chhehvelte chuan an zut thin. December-a zut tante pawh an awm tho a, a zut hun tak tak chu January hi a ni. Kuminah an zut zo tawh a, thar hnem tho mah se kum dang an pha lo.

Nikum lamah ruah a tam a, hei hi hmarchain a tuar nia an hriat thu te, ruah a tam avangin a hnah a kir tih te, hmarcha a pul tih te an sawi.

Thingsai khuain kum khatah hmarcha hi kg 400 te an thar thin a, kumin chu chutiang zat an pha lo tih an sawi. A zat tak hi la belhkhawm lo mah se kum hmasa an pha lo tih a chian thu an sawi a ni.

Hmarcha hi vaiin an lei thin a, kg-ah Rs 250 te, chu aia to tein an lei thin. A hralhna lamah harsatna a awm ngai lo tih an sawi a, a to deuh tum leh a tlawm deuh tum chu a awm a, mahse hralh theih loh emaw hralhna tur hriat loh emaw an awm ngai lo tih an sawi. A leitute hi tute in emawah an thleng a, hmarcha kg 1-ah Rs 5 an chawi a, chu pawh chu an hlawkna pakhatah an chhiar.