Ramin a mamawh chu hmasawnna a ni a, a do zawng ni loin, a chhawr tangkai turin a chhunga cheng mipui inbuatsaih a tul tih BJP Mizoram president Vanlalhmuaka chuan a sawi.
Zirtawpnia BJP State office-a inkhawmah Vanlalhmuaka chuan Mizoramin heti khawpin development kan mamawh a, a dawng tura kan inbuatsaih lo lutuk leh a lo luhna atan kawngka kan hawng tha duhlo chu a pawi hle, tiin, India ram hmun hrang hrangah development nasa taka a thlen mek laiin, keini erawhin a do zawngin hma kan la fo a, kan la harh hleithei lo tih a sawi.
Sawrkar laipui hmalakna in development hna nasa taka thawh mek a ni tih sawiin, “Aizawl- Champhai intlawhpawh nan hun tam tak kan khawhral thin a, tunah chuan darkar reilote chhungin kan intlawhpawh thei tawh. Heng hmasawnna lo thleng hi mipuiin kan lo suangtuah tawh thin kha a ni. Nakin lawkah chuan chhim lamah lawng lianin bungrua a rawn phur anga, chuta tang chuan bungrua kan la chaw lut ruih ruih anga, Mizoram kaltlangin NE state hi kan la chawm thei hial zawk dawn. Mizoram hmabak hi a êng hle a, a chhunga cheng hi kan pawimawh hle dawn,” a ti.
Mizoramin a mamawh hmasawnna chu kan hma lawkah ban phak maiah a awm a, a dawngsawng turin inbuatsaih ila, hlauh tur chi a ni lo tih BJP State president hian a sawi. “Eng pawh sawrkar se, sawrkar tih tur pawimawh chu development tho a ni. Ram thenkhat, development nasa taka dawngtute an inbuatsaihna that tawk loh vanga kawng tam taka tawrhna awm thei a awm a, chuvangin ramin development a dawn ruala chu hmasawnna chu kan lo dawnsawn thiam theih nan mipui inbuatsaih a tul hle,” a ti.
Hmasawnna dawngsawng turin inbuatsaih ang – Vanlalhmuaka
Get real time updates directly on you device, subscribe now.
Prev Post