Hmasawnna hna duanah a theih chen chen privatize zel a tha – CM

Sawrkarin hmasawnna hna a ruahman leh duan chu a theihna chin chinah privatize zel a \ha tih chief minister Zoramthanga chuan a sawi.
Mizoram State Cooperative Marketing & Consumers’ Federation Ltd. (MIZOFED) in Aizawla Annual General Assembly vawi 25-na an hmang a; chief minister Pu Zoramthanga chuan khuallian niin he hun hi a hmanpui.
Cooperative movement chu ramin chak zawka hma a sawn theihna’n a pawimawh, tiin, hmasawnna hna sawrkarin a ruahman leh a duan chu a theihna chen chenah privatize zel tha a tih thu a sawi a. Mizoram hmasawnna leh siamthat hna chu a ram neitu, a chhunga chengte kutah a innghah thu sawiin, “Hrileng leh thildang dang avangin harsatna tawk mah ila, kan tawn aia chhiatna nasa zawk lo tawng tawh ram ropui taka insiam a intungding leh ta te hre rengin, hmasawna nasa zawk kan thlen thei a ni tih hria a, mahni zawn \heuhah \hahnemngai taka ram tan thawk ang u,” a ti.
Hmasawnna atana cooperative society din pawimawhna leh tulna hmathlir nei chungin a remchan dan angin MIZOFED bul tan a ni tih chief minister hian a sawi a. Pawl chungtlung zawkah insiamin kalphung felfai tak nei a, hlawkna tam zawkte tel theia an awm chho ta chu lawmawm a tih thu a sawi.
Cooperative Societies registrar Amol Srivastava chuan cooperative movement chu democracy leh sumdawnna kalphung rinawm leh innghahna tlak kalkawp a ni tih sawiin, MIZOFED kalphung chuan chu chu a phawkchhuak hle nia a hriat thu a sawi.
MIZOFED hi cooperative marketing leh consumer federation a nih angin sumdawnna hlawm thum – petrol oil lubricants (POL), liquified petroleum gas (LPG) leh essential and consumer (E&C) a kalpui a. Petrol pump hi Mizoram hmun 9 – Aizawlah hmun hnih, Lunglei, Lawngtlai, Vairengte, Kolasib, Champhai, Hnahthial leh Thenzawlah a nei a. Kawnpui, Hrangchalkawn, Champhai leh Phun-chawngah a siam thar leh dawn mek.
Eirawngbawlna gas (LPG) ah district 6 – Aizawl, Champhai, Kolasib, Serchhip, Mamit leh Siaha-ah dealership a nei a. Essential commodities leh consumer item chi hrang hrang – Mahakosh edible oil (tel), Amul products leh Hawkins pressure cooker-ah dealer a nih bakah item dang mipui mamawhte rate tlawmin a zuar a. Kum 2021- 2022 chhunga MIZOFED net profit chu Rs. 1,77,24,44.15 a ni a. Tunah hian thawktu 169 an awm a ni.