Zofate hnam anga kan dinchhuahna atan YMA (Young Mizo Association) chu a pawimawh tih Central YMA president R Lalngheta chuan a sawi.
June 15 – YMA Day denchhena thuchah a siamah Central YMA president chuan, kan hnam kan ram a lo parchhuah a, hnam anga kan dinchhuahna turin YMA hi a pawimawh takzet tih a sawi a. “Mizoram tan, kan hnam tan YMA hi a \angkai hle a, ram leh hnam tan theihtawpin ke a pen a, a theihna chinah Zofate tan a tlanchhe ngai lo,” a ti.
Zofate inpui chu Mizoram a ni a, hei lo hi inpui kan nei lo, tia sawiin, tunhnaiah Burma, Bangladesh leh Manipur atangin buaina avangin Mizoramah Zofate an sahimna zawngin an lo tlankhawm tih a sawi a. Mizoram miten kan lo tuamhlawm a, lo chhawmdawl chu kan tih tur a ni tih a sawi. A bikin tunhnaiah Manipur-a Zofate silaimu karah an la awm, in leh lo chana nunna chante theihnghilh loin Mizo mipuite an tan kan tih theih tawkah tlanchhe lo ang u, tiin a sawi.
YMA chu tanpui ngaite tanpuitu a nih angin kumin YMA Day-ah tanpui ngaite tanpui kawngah ke pen thar leh turin R Lalngheta chuan YMA member-te a sawm. “Pachhia, hmeithai, fahrah, mangangte tan nu leh pa kan nih tawh thin angin, ni zel ang u,” a ti.
Zofa hmun hrang hranga awmte leh Mizoram chhunga awm YMA member-ten YMA Day hlim taka hmang turin a duhsak tih Central YMA president hian a sawi bawk.
Tunah hian Central YMA hnuaiah Aizawl City Branch 108 a awm a; Sub Hqrs. 8, Group 50, branch 820 awmin, member 4,73,872 awmin mipa 2,76,689 leh hmeichhia 1,97,183 an awm a ni.
Hnam anga dinchhuahna’n YMA a pawimawh – CYMA president
Get real time updates directly on you device, subscribe now.