Hmasawnna hnathawh kawnga SDG leh UIF buaipui dan tur hrilh

Aizawl Municipal Corporation leh Planning & Programme Implementation department tangdun chuan local council zawng zawng leh Ward Committee-te tan Sustainable Development Goals (SDG) leh Urban Indicators Framework data khawnkhawm tura an hriat tur leh tih dan tur hrilhin Thawhlehni khan an thutkhawmpui.
Hmanpuitu Aizawl deputy mayor R Lalawmpuii chuan, local council-te chu a taka khawtlang enkawltu an nih avangin an pawimawh a, eng thilah pawh khawtlang hruaitute chu koh tel loh theih loh an ni tih a sawi a. Ram leh khawtlang hmasawnna atan sustainable development a pawimawh avangin hmasawnna hnathawh dawn reng rengin hnathawh tur thlan thiam a tul tih a sawi.
Fund hrang hrang awm chu a hmanna tur chawpchilh taka ngaihtuah mai loin, uluk taka ruahmanna lo siam lawk a, khawtlang tana tangkai leh daihrei tur (sustain) thlan chhuah a pawimawh hle tih a sawi bawk.
Kum 2030 thlir chungin, hmasawnna hnathawhin SDG a thlawp tha em, tih tehna hmangin ward hrang hrang inelna buatsaih a nih tur thu leh lawmman pawh tha tak siam a nih tur thu a sawi R Lalawmpuii hian a sawi a. Lawmman atan AMC-in fund cheng nuai 5 an thawh ve dawn tih sawiin, khawtlang hmasawnna turin AMC leh vengtina local council-te chu tha taka an thawhho zel a tul tih a sawi a ni.
Workshop-ah hian sustainable development chungchang zirho niin, Mizoram dinhmun thlirlet a ni a. Urban indicator framework (khawpui hmasawnna tehna) atana data lakkhawm dan tur inzirtir a nih bakah data dik leh rintlak neih a pawimawh zia sawi a ni a. AMC chhunga ward zawng zawng tana intihsiakna buatsaih turah hian ward titha zual lawmman pek an nih dawn bakah ward zinga hmasawn tha hnenah “Fastest Moving /Most Improved” lawmman siam tum a ni.
He workshop-in a tum chu, data hmanga veng hrang hrang leh khawtlang dinhmun hriatchian bakah hmasawnna tangkai leh huapzo nei thei tura inzirtir a ni a. Zawhna awmte chhan a ni.