Police training-naah END inzir dawn

Excise & Narcotics Department-a direct recruitment hmanga lak inspector, sub-inspector leh constable-te Basic Course Training chu Police Training School (PTS) Thenzawl-ah Thawhlehni khan hawn a ni a. Hei hi PTS-a Police department pawnlam mi tan basic training neih vawikhatna tur a ni.
Excise & Narcotics Department-a thawk tura lak thar 33 telin, lak belh tur training zawm leh mai tur an awm bawk nia sawi a ni a. PTS Thenzawl principal Lalthakima chuan, Police Department leh Excise & Narcotics Department chu unau an ni a, hnathawhna kawnga mawhphurhna inang nei an ni, tiin, department pahnih inzawmna tichak lehzual tura hmun khata training an nei thei tur chu lawmawm a tih thu a sawi.
Training hi thla ruk chhung awh tur a ni a, indoor leh outdoor training a huam a, ram dan leh zirlai pawimawh dang bakah inthununna leh taksa hriselna tihchak kawngah zirtir leh hrual an ni ang.
Excise & Narcotics secretary C Lalruaia chuan professional training leh capacity building pawimawhz ia a sawi a. Mizoram Police Hqrs IGP (Training & Crime) Meghna Yadav pawhin teamwork, integrity leh professional conduct vawng tlat turin a fuih a. Uniformed service pahnih thawhdunna tichak turin he training hi a pawimawh tih a sawi bawk.