Hmasawnna ruhrel dinna atan Zuangtui a thlanawm – CM

Aizawl Zuangtui Vengah sawrkar ram ruak a la tam avangin hmasawnna ruhrel liantham tak tak dinna atan a thlanawm tih chief minister Zoramthanga chuan a sawi.
Aizawl Smart City Limited hmalakna hnuaia cheng vaibelchhe 15.05 senga Zuangtui Venga Indoor Stadium sak lungphum chu Inrinni khan chief minister hian a phum. Sawrkar ram ruak a la tam avangin hmasawnna ruhrel liantham tak tak dinna atan a thlanawm tih sawiin, sawrkar laipuiin cheng vaibelchhe 127 a sanction-na India ram hnam hrang hrangte inpumkhatna tur hmalakna pakhat ‘Unity Mall’ sakna atan pawh Zuangtui hi hmun remchang a nih dan te, helai hmun hi a la pawimawh dawn chauh avanga kawng zauh leh siam hna thawh leh thildangah ruahmanna siam a nih thu a sawi.
Hmasawnna ruhrel tha din hian a pawimawhna zar zoin hmasawnna dang a thlen belh thin tih a sawi a. He indoor stadium pawh hi Zuangtui leh a chhehvel veng tan sports lamah bakah sumdawnna leh thildangah hmasawnna engemaw tala a thlen phah a beisei tih a sawi a ni.
Sports & Youth Servcies minister Robert Romawia Royte chuan badminton leh sports discipline dangah Mizo thalaite kan thiamin hmasawnna tur rual kan awt thin hle a, kan mamawhna chhanna sawrkar hotute hnen atangin kan hmu thin, tiin lawmawm a tih thu a sawi.
Aizawl Smart City Ltd CEO CC Lalchuangkima sawi danin, he stadium sak hna hi tan a nih hma in a sakna tur lei zawl rem deuh ni mah se, soil testing-ah a nghet tawk lo (low soil bearing capacity) tih hmuhchhuah a ni a. Soil test report-in a rawt angin Mizorama a hmasa ber atan pile foundation hman a ni. Piling-ah hian lei hnuai thuk takah ban phun hmasak phawt a ni a. Piling foundation chu a nghet tawk em tia enfiahna (pile load test) chu 2022 December 5 khan neiin, result tha hmu in sak chhunzawm a ni ta a ni.
A sa tur hian open tender kaltlangin F Lalliansanga, Aizawl Venglai thlan a ni a. 2022 June 17-a hna tan niin, ruahman ang chuan thla 18 chhunga zawh hman tur a ni a. Tunah hian a sakna atan cheng vaibelchhe 2.06 hman a ni tawh a, physical progress chu 29.09% a ni. Badminton court paruk leh gallery mi 345 thut lenna tur a awm dawn a. Ground floor ah lirthei dahna bakah room hrang hrang mamawhte dah a ni ang. First floor ah gymnasium, dormitory, changing & locker room, first aid room, coach room, yoga room leh a dangte atan ruahman a ni.