Hmeh chhin theih EVM

MLA inthlanpui inbuatsaihna atan Thawhtanni khan DC office Aizawlah demonstration mobile van chu district election officer, bawrhsap Dr Lalhriatzuali Ralte chuan a vailiam. Demonstration mobile van hi Election Commission of India duhdanin EVM/ VVPAT hman dan mipui hnena a tam thei anga hrilhhriat a nih theih nana ruahman a nih thu a sawi.
Demonstration mobile van hi Aizawl district-a Assembly constituency tina polling station awmna chin zawng zawnga kalkual tura ruahman a ni a, tun dinhmunah lirthei pakhat chauh ruahman phawt niin, hei aia tam hi a tul anga ruahman belh tum a ni. Hei hian a tum ber chu, inthlan ni a vote thlak danah mipui an buai lohna’n inhrilhhriatna leh vote thlak dan inzir chhinna atana tih a ni.