Hmeichhe candidate tam \um

On Mar 25, 2026 2 0

Inthlang turin Aizawl a inbuatsaih mek a, politics ngaihvente chuan he inthlan lo awm tur hi titi-ah an neih tawh.
Tuna chiang tawhah chuan party paliin Aizawl Municipal Corporation (AMC) inthlan an chuh dawn a, tuna lang thei chinah pawh hmeichhe candidate an tam dawn tih a chiang tawh.
AMC-ah hian ward 19 a awm a, chung zinga paruk chu hmeichhiate tana hauh (reserve) a ni. Congress party, ZPM leh MNF te’n hmeichhe seat-ah candidate an nei thap dawn a, BJP-in pathum an nei dawn bawk. Hmeichhe bialah candidate 21 an awm tawh.
Mipa leh hmeichhe din theih ve vena general seat-ah hmeichhe candidate an awm nual dawn bawk; ZPM atangin hmeichhe pathum an ding dawn a, Congress leh MNF atangin pakhat ve ve an ding dawn bawk.
Tuna hriat theih chinah hmeichhe candidate 26 an awm tawh a, candidate an tam tum a nih bakah hmeichhia an tlin tam tum pawh a ni thei.
General seat pangaah hmeichhe candidate an awm tawh a, anni hian tunah rih chuan hmeichhe khingpui an nei lo thap. Chuvangin general seat pangaah hian hmeichhia lo tling thap ta se, hmeichhe bialah hmeichhe paruk an tling dawn tih a chiang sa bawk si a, hmeichhia 11 an tling dawn tihna a ni.
“Hmeichhia 11 tling ta se, mayor-ah pawh hmeichhia an awm nawlh thei dawn tihna a ni a, hmeichhe candidate an tam a ni mai lo a, hmeichhe corporator pawh tum dang aiin an tam thei dawn a. Chuvangin mayor leh executive corporator pawh an chang thup thei dawn a nih hi,” chanchinbumi pakhat chuan a ti a, tun tum inthlan hi thil chhinchhiah tlak tak a ni ve tih a sawi. AMC-ah hian ward 19 a awm a, hmeichhia 11 leh mipa pariat an tlin theih dan a awm. Chuti a nih chuan mipa aiin hmeichhia an tam thei dawn tihna a ni.
General seat-a ding tur hmeichhiate hi, MNF leh Congress candidate hi inthlan hnuhnung bera general seat-a tling tawh ve ve an ni a, ZPM candidate pathumte hi inthlan hnuhnung bera hmeichhe bial a nih laia an tlinna biala tlingte theuh an ni.
AMC inthlan lo awm turah hian April ni 21-ah vote thlak tur a ni a, Congress, ZPM leh MNF te’n candidate 19 an nei dawn tih an puang tawh a, BJP-in candidate 11 an nei dawn. PC party-in candidate an nei dawn em tih a la hriat loh a, independent ticket-a din tum hriat a ni rih lo bawk.