Hmeichhe chunga thil thlengin ram a tuam Ngawi reng lo turin CM Zorama’n PM a kar

Hmeichhe chunga thil thlengin ram a tuam
Ngawi reng lo turin CM Zorama’n PM a kar
Manipur buaina kaihhnawiha Zohnahthlak hmeichhe chunga thil thleng video lak, July 19-a darh chuan India ram pum a tuam nghal a, demna thu a ri ring hle. MNizoram chief minister Zoramthanga chuan Prime minister leh Manipur chief minister chu ngawi reng lo turin a kar.
Chief minister Zoramthanga hian a instagram leh twitter kaltlangin rorel tura prime minister leh Manipur chief minister a phut thu a sawi a, “Ngawih chuh hun a ni ta lo e!” a ti.
Manipur-a nunrawng taka chetnain ram pum a nghawng tia sawiin, “Manipur-a kan Vaiphei hmeichhiate chunga nunrawnna lantirna video darh chhuak hian min ti thin\hawngin min deng na hle a. Video-a kan hmuh zahmawh thila inbeihna hi zahngaihna tel lo nunrawng taka chetna uchuak, zahthlak tawpkhawk leh mihring chunga nunrawnna lantirna demawm tawp a ni. Manipur buaina chinfel leh tihtawp hlen dan kawng ngaihtuah a \ul tawh takzet a, a tihtawp dan ngaihtuah theitu tur pawh sawrkar laipui chauh a ni,” a ti.
“Ka sawi nawn leh duh chu – Manipur buainaah hian mi tam takin nunna an chan tawh a, thisen tam tak a luangral tawh a, hliam tuar leh sahimna zawnga hmundang pan mi tam tak an awm belh zel bawk. Chu’ng zingah chuan ka chipui Zo hnahthlak tam tak an tel a, kan chipuite tawrhna chu kan tawrhna a nih miau avangin ngawihsan theih a ni lo,” a ti bawk.
Buaina chinfel dan kawng awm apiang dapa a rang thei ang bera ngaihtuah a ngai tih Zoramthanga hian a sawi a. “Chu chu mawhphurhna la ngei ngei tura ngaihte mawhphurhna, Manipur sawrkar leh sawrkar laipui tihmakmawh pawh a ni. A rang thei ang bera remna leh muanna kawng zawn hi an koa innghat tlat a ni a. Manipur chief minister N Biren Singh leh prime minister Narendra Modi pawh a rang thei ang bera hma la nghal tur leh pawikhawihtute man chhuak a, dan hmaa rorelsak thuai turin ka phut a ni,” a ti.
Tun tuma Manipur buaina hi kumin May 3-a intan a ni a, Zohnahthlak hmeichhiate an zahawmna tibawrhbang zawnga chetna hi May 4-a thleng a ni tih Indigenous Tribal Leaders’ Forum (ITLF) hruaitute chuan an sawi.
Thudawn danin, May 3-a buaina a chhuah khan Meitei mi nia hriat pakhat chuan social media lamah Lamka (Churachandpur tih thin) ah Meitei hmeichhiate nghaisak leh pawngsual ni awmin thudik lo a thehdarh a. Thudik finfiahna awm lo kal zel hrinchhuah nia sawi a ni.
May 4-a Kangkpokpi district-a Vaiphei khaw pakhat, Meitei firfiakten an luhchhuah laia ramhnuai lama tlanchhia chhungkaw pakhat chu Manipur Police-ten hruaichhuakin hmun him lam panpui an tumnaah heng Meitei firfiakte hian lo dangin, an lak atang hian an chhuh lui a, hmeichhe pathum – kum 21 mi leh kum 42 mi leh kum 56 mi bakah an chhungkua ami mipa pahnih chu an hruai hrang a. Mipa upa zawk hi thah niin, hmeichhe pahnih hi phelh ruaha an hmeichhe zahawmna tihbawrhban sak an ni a, anmahni chhan tumtu mipa kum 19 mi pawhin a nunna a chan phah nia sawi a ni.
He thil chungchangah hian Saikul Police Station-ah pawikhawihtute zawnchhuah sak turin FIR thehluh ni mah se, a reh zui vang vang a. July 19-a video a darh hnu ah demna thu a ri ta chauh. ITLF hruaitute chuan Zohnahthlakte tawrhna, a bikin hmeichhiate chunga hleilenna chu aupui reng mah se, a nawlpuiin an bengkhawn tak tak ngai lo hiala an ngaih thu an sawi nghe nghe.
India media lianten an ngaihven zui nghal bakah mihring, a bikin hmeichhiate dikna humhimna tura pawl dingte chuan an demna thu leh pawikhawihtute man a, action la tura Manipur sawrkar an phut thu an aupui nghal a. Heng zingah hian Naga hmeichhe pawl leh Manipur-a Naga MLA inthurualte pawh an tel a ni.
Supreme Court-in thu leh hla a neih bakah Ningani atanga Parliament thutkhawmah pawh rorel hleithei loin Manipur buaina chungchang sawiho phutin eptu member-ten sawrkar lai an nawr a ni.
July 20 tlai khan hmeichhe pahnihte chunga hleilennaa, hmeichhe pakhat kuahbettu chu police-ten an man tih Manipur Police thuchhuak chuan a tarlang a. An chhuizui zel tih an sawi a ni.

Zofate thlavang hauh
Zoram puma neih rel
Manipur-a Zohnahthlakte tawrhna hriatpui leh tawrpuina atan NGO Coordination Committee chuan July 25 hian Mizoram pumah kawng zawh huaihawt a rel.
Ningania NGO Coordination Committee thukhawm chuan Manipur-a Zohnahthlakte harsatna tawh mek a sawihoa, an chunga tawrhna thleng mek hriatpuina leh tawrhpuina’n July 25 (Thawhlehni) hian Mizoram pumah “Zohnahthlak unaute thlavang hauhna” kawngzawh huaihawt nise, tiin a rel. Mizo mipui thahnemngai taka thawkchhuak turin a sawm a ni.
Kawngzawh ni hian Mizorama in tinah puandum zar theuh turin NGO Coordination Committee chuan a ngen a. Sawrkar hnathawk, zirlai, sumdawng leh lirtheia eizawngte pawh kawngzawhnaah hian an hnatul kalsana tel turin a ngen.
Mizorama Meitei awm mekte an sahimna atan fimkhur turin NGO Coordination Committee chuan a ngen tih a sawi bawk.