NIT hmun tur forest clearance tifel

NIT hmun tur forest clearance tifel
Minister Dr R Lalthangliana chuan sawrkar laipuia Forest ministry hotute hnenah NIT Mizoram hmun tur Lengpui ami, forest clearance tihfel theih loh avanga hma lak that hleihtheih loh chu a tifel.
Kar kalta khan Higher & Technical Education minister Dr R Lalthangliana hian New Delhi-ah Forest ministry tlawhin Inspector General of Forest Ramesh Pandey a hmu a, National Institute of Technology (NIT) Mizoram dinna tur hmunhma Lengpui ami, rei tak chhung forest clearance hmuh loh vanga hma lak theih loh chungchang a sawipui a, an sawidun hnu ah Forest hotu hian forest clearance hi a lo tihfel sak nghal a, hemi atana sum chawi ngai pawh Ministry of Human Resources Development-in an chawi vek dawn a, Mizoram sawrkar chawi tur a awm lo tih sawi a ni.
Mizorama project lian tak tak kalpui mekah forest clearance ngai a awm thin avanga hmasdawnna hnathawh sukuk a awm thin chu pawi a tih thu Mizoram minister hian thlenin, engemawchen chu ngaihnathiamna nen en thin turin a ngen.
Commerce & Industries minister ni bawk Dr R Lalthangliana hian Union Agriculture & Farmers’ Welfare secretary, National Bamboo Mission enkawltu ni bawk Manoj Ahuja kawmin, 2006- 2007 daih tawha Mizoram puma district-wise resource mapping an tih chu a hlui deuh tawh avangin a thara siamthat sak vek turin a ngen a; tha a tih thu lo hrilhin sum sen ngai ang ang pawh tihsak vek a intiam. Mizoram Remote Sensing Application Centre leh data te a thara kalpui tum a nih thu leh hemi atan hian sawrkar laipui atanga technical mi, mithiam rawn thawn a tum thu a lo hrilh.
Bamboo Development Agency Mizoram hmalaknaa thilsiam chi hrang hrang zing ami, agarbati stick chu thildanga thlak sak turin a ngen bawk a. Duh aia a hlawk loh avangin mau hmanga siam thildang – toothbrush adt. siamchhuah a lo phalsak. Mau hmanga eizawnna ngelnghet siamna kawnga hmalakna chi hrang hrang an sawidun a, eizawnna atana hmangtuten samkhai leh rip lutuk loa hma an lak theihna’n tanpuina (subsidy) ngaihtuah sak tura a thlen pawh Manoj Ahuja hian tihhlawhtlin ngei a tum thu a lo hrilh. India ram pawn hmun hrang hranga mau hnah atanga thingpuife (tea-making) an siam ang chu Mizorama tih ve dan kawng zawn minister-in rawt chu lo ngaihpawimawh sak a tum thu a hrilh a ni.
Health minister Dr R Lalthangliana hi New Delhi-a Max Hospital medical director Dr Gurpreet Singh leh a thawhpuite nen an inkawm a, Mizoram atanga anmahni pan thintu damlote an lo dawnsawn danah leh, damlo retheite leh tawng thiamlote an kal changa ngaihhnathiamna nen an lo dawm hram hram thinnaah lawmthu a hrilh.
Border Roads Organization director general Rajeev Chaudhary hnenah Lunglei leh Lawngtlai district inkalpawhna atana pawimawh Tuipui ‘D’ Darzo kai lei dawh tur a sawipui a. DG hian clearance an tihfel bakah tender an koh tawh thu lo hrilhin, a khawihtu tur contractor pawh June ralhmaa thlanfel an inbeisei thu a lo hrilh a ni. He project hi cheng vaibelchhe 90 hu niin, July thla chuan hna tan theih beisei a ni.