Hmeichhe dinhmun chawikan kawngah tangrual tha tawk lo

Mizo hmeichhiate dinhmun chawikang zel turin sawrkar, kohhran leh society an la tangrual tha tawk lo nia a ngaih thu Zakapa Award dawngtu Dr Lalrinawmi Ralte chuan a sawi.
Thawtanni khan MNF office-ah Mizo National Women Front (MNWF) pualin inkhawm neih a ni a. Zakapa Award dawngtu, hmeichhe chhuanawm Dr Lalrinawmi Ralte hian thu sawiin, Mizo hmeichhiate dinhmun chawikang zel turin sawrkar, kohhran leh society tanrual a ngai a. Tun dinhmunah chuan an tangrual tha tawk lo niin a lang tih a sawi. “Mizo hmeichhiate dinhmun chawikang tura sawrkar, kohhran leh khawtlang a tanrual theih nan hmahruaitu an awm a ngai,” a ti.
Ram, kohhran leh khawtlang inrelbawlnaa thutlukna siamtuah hmeichhia an awm ve a tul takzet tih a sawi a. Hmeichhiate chu infuih tawn a, tihrual ngaite tih rualin hmalam pan turin a sawm. “Ram inrelbawlnaah hmeichhia an tel ve zauh zauh thin a. Kan la lut tam tawk loa, dinhmun pawimawh kan chelh tam ve a ngai,” Dr Lalrinawmi Ralte hian a ti.