Hmeichhe footballer Workshop

Mizoram Football Association hnuaia Women’s Committee leh Women and Child Development, Govt of Mizoram ten an huaihawt ni khat awh State Level Workshop on Sports & Gender – Challenges and Way Forward chu Ningani khan PHQ Multipurpose Hall, Aizawl ah Sports Minister Pu Lalnghinglova Hmar in a hawng.
District hrang hrang Football Association aiawha hmeichhe footballer kalkhawmte chu Pu Lalnghinglova Hmar chuan hmeichhia an nih avanga inhmu hniam lo tur leh chutihruala in dah sang kher lo turin a chah a. Mizoram hmun hrang hrangah hmeichhe footballer ten inkhelh zirna hun an nei meuh lo tih a hriat thu te, Tournament ah chauh khelhna hun an neih thin thu te a hriatpui thu hrilhin, hemi atanga hmasawn tura ke an pen dawn thu a sawi.
Sports Minister chuan Association a hausa si lo, game khelh in duh si, a tam zawk Aizawl pawn lama cheng in ni a,
Hmelhriat loh inah in rawn thleng thin a, in harsatna kan hriatpui cheu a ni, tiin Women and Child Development te nen thawk ho zel a, eizawnna tling sports chu tihtak zeta kalpui tum a nih thu a sawi zui bawk.
Sports Minister chuan Home Minister hnenah Police hmeichhe football team din tura a ngen tawh thu a sawi bawk.
“Kan harsatna hian hnualna thlen lo se, a sang ber kan thleng thei ang tih ka ring tlat a ni” a ti bawk.
Sports & Gender Workshop ah hian MFA chuan India International football player Grace H Lalrampari, Cindy Remruatpuii Colney, C. Ramthanpuii, Lalduhawmi, B Lalhriattiri, Offee Lalhmingchhuanpuii leh Gladys Zonunsangi te bakah National Referee pathum Level 5 ni phak – F. Zohmingliani, Lalhruaizeli Khiangte leh Lalthansangi te, Mizo hmeichhe zinga AFC ‘C’ Coaching License nei awmchhun R. Lalnunsangi te hnenah chawimawina a hlan a ni.
Pi Zoramthangi Chhangte, Director, Women and Child Development chuan an department in an zirchianna atanga Mizoram a infiammite zingah mipa an tam hle laia hmeichhia an la beihtham hle thu a sawi a, Football ah hmeichhia te hmasawnna atan MFA nena thawh dun zel an inhuam thu a sawi bawk. Pi Flora Laltanpuii, Deputy Director, Women and Child Development pawhin infiammite fuihna thu leh India rama hmeichhiate hmasawnna leh himna tura ruahmanna hrang hrang a sawi bawk.
Ningani a workshop ah hian MFA lam atangin Pu PC Vanlalhruaia, Sr Vice President, Er. Lalnunzira, Pi Lalengvari, Pi Susan R. Ralte leh Pi Zonunthari te pawn thu an sawi a ni.