Hmeichhe jail tangten eizawnna tur thil zir

Central Women Jail Aizawla tang mekte tan District Legal Services Authority Aizawl bultumin Inrinni khan thiamthil zirna buatsaih sak an ni.
Training hawnna hi Gauhati High Court judge Justice Marli Vankung chuan a hmanpui a. Jail tang mekte chu thahnemngai taka skill development training chu kalpui a, an thil zirte hmanga khua leh tui tha ni turin a chah.
DLSA Aizawl secretary Lalrochami Ralte chuan hmeichhe tang mekte tana skill development training buatsaih chu National Legal Services Authority scheme atanga ruahman a ni, tiin, he scheme atang hian jail tangte chu an tan chhunga nunphung pangngai an zawh theihna’n ei an zawn theihna tur thiamthil zirtir thin an ni a, hei hi hmang tangkai a, jail an chhuahsan hnu pawha eizawnna nghet an neih nan leh an intodelh ngeina’n hman tangkai a tul tih a sawi a ni.
Training-ah hian chhang ur, puanthui, puantah, beauty culture leh sam tan bakah eitur chi hrang hrang siamdan chu mithiamten an zirtir a ni.