Hmeichhe kut thlak vangin MSCW-in thubuai siamsak

Mipa pakhatin a kalpui hmeichhia kut a thlak lai closed circuit television (cctv) camera-a lang chungchangah thubuai a lut a, Mizoram State Commission for Women chuan danin thuneihna a pek angin kutthlaktu hi thubuai a siamsak. 2024 December 8 zan khan cctv-a video thlalak a darh a, scooter-a inphur hmeichhia leh mipa kawngsira awmdun lai a lang a, an thu hla hriat theih ni lo mah se, mipa hian a hmeichhia a beng, chhuih leh namthlu lai a lang a ni. Hemi zan la la hian police chuan an bawhzui nghal a, FIR thehlut an awm loh bakah cctv camera neitu/ thehdarhtu hi hriat a nih loh avangin hma lak viau theih a ni lo thung.
Thawhtanni khan Mizoram State Commission for Women (MSCW) chuan thubuai – suo moto a ziaklut a. ‘Ualau taka kut inthlakna a thleng hi ngaih thutak ngai a ni a, hmeichhe zahawmna leh dikna chanvo tih bawrhbanna nasa tak niin Commission chuan a ngai a, nunrawng taka kut inthlakna nia a lan avangin suo moto cognizance lak ngei theihna tur case niin a hria a ni,’ a ti.
He video-a lang hmeichhia leh mipa hi police chuan an hre tawh a, inngaizawng an ni. Mipa hi C. Lalnunfela (22) Chanmari West nia hriat a ni a. Chutihlaiin, vantlanga tlangthan tir rem lo chin a awm avangin chanchin kimchang puanzar rem lo a la awm.
Mizoram Police pawhin an thudawn danin he thil thleng avang hian Kulikawn Police Station-ah thubuai an ziaklut tawh a ni.
MSCW chuan kutthlak tuartu hian inenkawl zuina a mamawh em tih enzui ngai a nih bakah medical report tha leh felfai tak a awm theihnan, tha taka enkawl zui a ni em tih police-in an ngaihven zui zel a beisei tih a sawi a. December 9 atanga chhiara ni sarih chhungin MSCW-ah ziaka report thehlut turin Kulikawn Police Station officer -in- charge chu a ti bawk.
Hetianga pawikhawihna video darh zau vak hian hmeichhe tan tawrhna dang a thlen belh theih avangin social media platform hrang hranga thehdarhtuten delete hram tura beisei an ni tih MSCW hian a sawi a. Video darh zel lohna’n hma la zui turin Cyber Crime Police Station officer in charge beisei a ni tih a sawi.