Police hnaruak hnawhkhah tum

Police hnaruak hnawhkhah tum
Mizoram Police Department-a hnaruak engemawzat hnawhkhat turin hma an la mek tih chief minister Lalduhoma chuan a sawi
Thawhtanni atanga 1st Bn. MAP Ground Armed Venga neih tan 22nd Mizoram Police Sports Meet a hawnnaah chief minister chuan, sawrkarin police-te a ngaihsak tih a takin an lantir a, an transfer TA leh hamthatna dang, hun rei tak lo tang tawhte an pechhuak nasa a, rifle allowance pawh an tipung tih a sawi.
“In indaihlohna kan hria a, hnaruak engemawzat hnawhkhat turin hma kan la mek,” finance changtu chief minister hian a ti.
Ram changkangah chuan mipuiin police an zahin an ngaisang a, naupang pawhin police leh fire fighter nih an chak thin a. An police-te entawntlaka an nun vang leh khawtlang tana hna tha an thawh vang a ni tih a sawi. Mizoram Police pawh entawn tlak ni tura fuihin, “Nunphung dik lo vangin natnain min tibuai nasa lutuk niin a lang a, kan insiamthat a ngai hle,” a ti. Home minister ruahmannaa lumin August atanga police mi leh sa zawng zawng taksa fit-na atana programme buatsaih chu unit tinin tha taka zawm zel turin a chah.
Mizoram Police Sports Meet hawnna hi Home minister K Sapdanga pawhin a hmanpui a. DGP Anil Shukla chuan infiamna kawnga Mizoram Police hmasawnna langsar a sawi bawk.
Sports Meet-ah hian police-te hi pawl (contingent) 12 ah inthenin, sports discipline 18-ah infiammi 1200 an inel dawn a. December 13 khian khar a ni ang. Kum 1987 atang khan harsatna a awm loh chuan kumtin Sports Meet hi an buatsaih thin.