Hmeichhe naupang te himna leh dikna chanvo humhalh a tul zia inzirtirna atan National Girl Child Day 2023 chu ram chhung hmun dang rualin Nilaini khan Mizoramah pawh district hrang hrangah hawn a ni a. January 24 thleng hman a ni ang.
-- Advertisement --
Aizawla a hawnna chu Social Welfare minister Er Lalrinawma hoin hman a ni a. Hmeichhe naupangte pual ni pawimawh takah hian an tana khawvel chhenfakawm, ralmuang, thlamuang leh him siam a tul takzet tih a sawi.
“Nuten fate thu tha kan hrilh a pawimawh a. Mipa pawh, hmeichhia pawh, pai a, hring a, chawiliantu chu nute an ni. Fate chuan anmahni enkawltu nute thu an ngaichang thin a, chuvangin hmeichhe naupangte tana khawvel tha siam tur chuan a bultanna leh a hlawhtlinna thui tak chu hmeichhiate ah a innghat a, nuten kan fate hnenah hmeichhiate zah tur leh enhrang lo tura kan zirtir a ngai,” a ti.
National Girl Child Day hawnnaah hian intiamkamna (pledge) sawirual a ni a. Hmeichhe naupangten him tak leh thlamuang taka khawvel an hman theihna tur leh zirna leh thiamna changtlung an neih zel theihna turin, anmahni venghlim tlat chunga theihtawp chhuah turin thu tiam a ni.
National Girl Child Day hi January 18-24 chhung hman tur a ni a. Hmeichhe zirlaite tan hmeichhe naupang hlutna lam pholang thei painting competition buatsaih te; Mizoram State Sports Council nena tangdunin hmeichhe naupangte zinga sports lam uar tura infuihnate; Beti Bachao Beti Padhao (BBBP) scheme lam hawi thuziak sawrkar leh mimal ina tar te; hmeichhe fate hlutna lam hawi poster leh slogan writing competition buatsaih te; Special Gram Sabha koin, naupangte humhim leh hmeichhiate tana skill devolopment pawimawhna zirho te; kohhran leh khawtlang hruaitute nen kum tlingloa inneih thatlohna te zirho a ni ang.