Hmeichhe tan- thlatin hunbi chungchanga hriattur

Hmeichhe thlatin hunbi neih dan hian an taksaa thil thleng tam tak a lantir a. Thlatin hunbi neih dan erawh a inang lo thei hle a, thiante leh unau te tana thil pangngai kha i tan a pangngai ve kher lo thei a, chuvangin mahni inhriatchian a pawimawh hle a ni.
Thlatin hunbi neih hian reproductive system-in hna a thawk tha tihna a ni a, i hunbi neihah thil danglam a awm a nih chuan taksa lamah harsatna i nei tihna a ni thei. Entir nan- a nasa lutuk emaw, i âwl emaw, a na viau emaw, a tlem lutuk emaw te pawh a ni thei. A tlangpui thuin a rei zawng hi ni 4 atanga ni 8 te pawh a ni thei a, hmeichhe thenkhat chuan ni 8 hnuah tlem tlem (spotting) an la nei thei. |henkhatah a rei a, thenkhatah a rei lo a, thenkhatah a tam a, thenkhatah a tlem. Chuvangin mahni inhriat-chian a pawimawh hle a ni.
Thlatin hunbi neih tan tirh lamah chuan a mumal lo thei a, mahse, kum 20 vel kai chinah chuan a cycle hi a mumal deuh tawh thin a, a awm hun, a rei zawng leh a tam dan te pawh a chhinchhiah theih deuh tawh. A tlangpui thuin menstrual cycle hi ni 28 vel a ni thin a, mahse, hmeichhe hrang hrangah a danglam thei. Chuvangin, i hunbi chu a tam leh tam loh lam emaw, a awm hun emaw lama buai ai chuan thildanglam thleng a awm em tih ngaihven zawk tur a ni.
1. I thlatin hunbi chu a khat thut emaw a tawp thut emaw a nih chuan, i kum a zirin a pawimawh thei. Kum 20-30 vel nih chuan nau pai tihna a ni thei. I inveng viau a nih pawhin nau i pai leh pai loh in-test ang che. Kum 40-50 velah chuan menopause hnaih tawh vang a ni thei. Thla 12 chhung a zawn zata i hul a nih chuan i menopause tihna a ni a. A tlangpui thuin kum 51 velah an menopause. a aia hma leh tlai deuh te pawh an awm tho.
2. Exercise lak nasat lutuk avangin thlatin hunbi a mumal loh phah thei. Infiammi thenkhatah hei hi a thleng fo a, exercise-induced amenorrhea an ti.
3. Hmeichhia ei leh in lama insum nasa lutuk, anorexia nervosa (thau hlau, thil ei tlem lutuk vanga cher telh telh) leh bulimia (thau hlauh vanga thil ei zawha inkawm luak thin) te hi an thlatin hunbi a mumal lo duh. Taksain a mamawh khawp chaw a hmuh loh chuan reproductive hormone insiam tur a nghawng a, chu chuan menstrual cycle a tibuai thei ta thin.
4. Thyroid, pituitary gland disorders, nau hnute pek, thau uchuak, oral contraceptives, stress, polycystic ovarian syndrome, hormone imbalance, ovarian failure leh uterus natna dang avangin thlatin hunbi a mumal lo thei. Oral contraceptive (naupai lohna damdawi ei chi) hi chuan a tlangpui thuin thlatin hunbi tih tawp aiin a chhuak a ti tlem zawk thin.
5. Thi a chhuah nasat hian kan taksain thisen siam nana a mamawh iron a hloh hnem a, iron kan tlakchham chuan kan red blood cell count a lo tlahniam a, thisen tlakchham vanga dawldang te a thlen thei a, thawhah leh zawi ngaiwh ngawihna te pawh a thlen thei. Thi chhuak nasa chu a chhan chi hrang hrang a awm thei a:
– Chhula bawk awm vang
– Nau chhiat emaw chi kawnga naupai
– Indanna damdawi thlak vang
6. Thlatin hunbi neih hun inkarah thi chhuak a awm chuan a rang thei anga doctor rawn tur a ni. Hei hi serh chhunga infection awm vang emaw, indanna ei theihnghilh vang emaw, chi kawnga naupai vang emaw cancer vang emaw te pawh a ni thei.
7. Hmeichhe thenkhat chuan an hunbi neih laiin hrehawm leh na an tuar lo a, thenkhat tan erawh a na viau thei. Na hian ni 1-2 vel a awh tlangpui a, thenkhat phei chuan hna te pawh an thulh phah hial thei. Hetianga hunbi neih laia na hi dysmenorrhea an ti a, kawthalo te pawhin a zui thei a, luak chhuak, lu-na leh kawng na te pawh an nei thei. A na hi thenkhatah chuan endometriosis emaw fibroids emaw vang te pawh a ni thei.
8. I hunbi chu a mumal loh a, ni sarih chhung thi chhuak a nasa hle a nih chuan doctor rawn thuai tur a ni.
9. I hunbi chu thla eng emawti chhung ni 21 ral hmaa a rawn inher chhuak thin emaw, ni 35 hnuah a rawn inherchhuak thin a nih chuan doctor rawn ang che.
10. I hunbi neih laia nidanga i hriat ngai loh na a awm thar a, i hunbi kar laka thi chhuak a awm chuan doctor rawn ang che.