Ladakh-ah dil khang chunga intlansiakin record an siam

Ladakh-ah Pangong Frozen Lake Marathon chu Guinness World Record-in dil khang chunga half-marathon sang ber (world’s highest frozen lake half-marathon)-ah an puang. Leh a sorkar aiawha thupuangtu chuan, “Ladakh Autonomous Hill Development Council (LAHDC) leh Adventure Sports Foundation of Ladakh (ASFL) tang kawpin India-ah a vawi khat nan frozen lake half-marathon an buatsaih a, khawvela frozen lake half marathon sang ber chu Pangong Lake-ah siam a ni a, khawvel ram hrang hrang atangin mi 75 an tlan,” a ti.
He half-marathon-ah hian Lukung khua atanga tlan tanin, Maan khuaah an tawp a, an tlan thui zawng hi km 21.9 a ni. Pangong Frozen Lake Half Marathon-ah hian mipa lamah Rigzen Gyurmeth chu pakhatna niin, darkar 1, minute 54 leh second 24-ah a tlan chhuak hman a, pahnihna chu Muneeb niin, 1:59:03-ah tlan thlengin, pathumna Arshad chu 2:00:19-ah a tlan thleng ve thung.
Hmeichhe lamah pakhatna chu Tsering Zangmo niin, 2:38:40-ah a tlan chhuak hman a, pahnihna Padma Rigzin chu 2:46:57-ah tlan chhuakin, pathumna Chuskit Angmo chu 3:00:22-ah a tlan chhuak hman ve thung.
He event-ah hian Ice-Hockey exhibition match pawh Lalok leh Chushul team ten an khel nghal bawk a ni.