Hmuhphiah hralh loh chin kan lei ang Sawhthing chawh hun tha kan nghak – Lalduhoma

Hmunphiah lei tura empanelled firm an thlante an lei zo thei lo a nih chuan hmunphiah ro chu sawrkarin a lei dawn tih chief minister Lalduhoma chuan a sawi a. Sawhthing chu a chawh hun pui ala thlen loh avangin kuthnathawktu hmakhua ngaiin an la nghahpui rih zawk tih a sawi bawk.
Zirtawpni khan Aizawl South II ZPM chuan Block Conference an nei a. Hmanpuitu chief minister chuan, an sawrkar tirhin ‘thlai thar buaipui an intiam nghal a. Nikumah hmunphiah bikah agreement an ziahpui company-in an timualpho hle a, kuminah erawh empanelled firm 7 nen agreement an ziak a, hmunphiah ro hi an lei zo vek thei lo a nih chuan sawrkarin a lei anga, home hrang hranga awm thalaite hnathawh tur an siamsak dawn tih a sawi.
An sawrkar tuk atangin beih an tawk nghal nia sawiin, “Thil tha kan tihte hmu thei loin sawiselna tur an zawng nasa hle a, ‘in sawhthing lei kan ba lo’ titute ngeiin kuthnathawktute kan ngaihsak chu min beihna an zawng leh si a, thil tha kan ti ang tih an hlau em em a, mahse kan ram tan hian thil tha tih kan thulh dawn chuang loa, kuthnathawktute an banah kaiin kan khai chhuak ngei dawn a ni,” a ti.
Tun dinhmunah sawhthing chawh hun runpui kan la thleng loa, kuthnathawktute hmakhaw ngaiin a to hun an nghahpui hret tih Lalduhoma hian a sawi. “Kan lo sawi tawh chu tihhlawhtlin ngei kan tum. Ram mipui hian min beiseina leh min tehna a sang bik a, tun sawrkarah hian buk lung han khai chhin ula, sawrkar laka lungawi lo nia in hriatte chu mimal hamthatna um an ni zel ang. A him chin leh a mawi chinah chuan party mite kan inhre ve ang, amaherawh chu mimal hamthatna duh lutuk avanga innawr vak vak hi a tha loa, ZPM-in ram siam kan tum dan nen pawh a inpersan hle,” a ti.
ZPM chu an danglam tur a ni, an tih kha a la ngai reng tih pawh a sawi a. Party leh sawrkar timualpho khawpa hna thawk chhia, ram hmangaihna nei lo, hlep hnem tum ringawt an awm a nih chuan party atang pawhin an inchawlh tir hreh dawn lo tih a sawi. “Sawrkar hmasa atanga kan chhawm, hna chhia leh tlo lo tak tak buaipui ngai a awm teuh a, ZPM sawrkar hnua thawh chu a tha bik tur a ni a, a danglam tur a ni,” chief minister hian a ti.
Aizawl South II bial chu kohhran leh sawrkar hmun pawimawh tak tak awmna, thlarau lama kan nun hruaitu pawimawh, khawtlang leh sawrkar tana mi tangkai awm tamna a nih angin, an party worker-te pawh nun uluk taka an awm a ngai bik tih a sawi bawk.