Hna duh leh thawktu duh tan
Mega Job Fair buatsaih dawn
Hnathawh tur duh hnathawktu duhte inbiak theihna tur Mega Job Fair chu Aizawlah May 9 & 10 hian buatsaih a ni dawn.
Labour, Employment, Skill Development & Entrepreneurship (LESDE) department bultumin Millennium Centre Roof Top-ah he Fair hi neih a ni dawn a. LESDE hotute chuan ram chhung leh pawna sumdawng company lian leh changtlung tak takte an sawmkhawm tih sawiin, Mizorama hna zawnglaite tan hnathawh tur 1800 chuang chhawpchhuah sak an tum tih an sawi.
Fair-ah hian company rawn tel zawng zawngten stall hranpa theuh an nei dawn a, hna zawngtuten an qualification leh an tuina milin stall hrang hrang an dawr kual thei dawn a. Hna zawngtute leh company te an inhmurem thei a nih chuan a hmun vekah hian hna an inpe nghal thei dawn tih an sawi a ni.
LESDE chuan he Job Fair-a tel tura an sawm company-te chu tehfung mumal tak hmanga an teh hnua an thlanchhuah an nih thu leh company rintlak an nih tur thu an sawi a. India ram pawn thlenga hnathawh theihna a nih bakah hnathawh tur awm hrang hrang zingah hian a hlawh tlem ber pawhin thla khatah Rs. 8000 a hlawh theih dawn tih an sawi bawk.
Job Fair atanga hna hmu te hi ram pawn lam amite pawh an ngaihven zui zel tur thu department hotute hian an sawi a ni.
Hna duh leh thawktu duh tan Mega Job Fair buatsaih dawn
Get real time updates directly on you device, subscribe now.