Roll atangin Tuikuk 4500 chuang paih tawh

Mizoram chhuahsana Tripura-a awm ta Tuikuk-te hming zawngchhuaka Mizoram roll atanga paih hna thawh kal mekah mi 4554 te paih an ni tawh tih thu dawn a ni.
Mizoram chhuahsana Tripura hmar lama relief camp-a hun engemaw chen an awm hnuah Tuikuk-te hi Mizorama kir lova Tripura-a inbengbel tura tih an ni a, an hming pawh Mizoram electoral roll atanga paih mek a ni.
Joint chief electoral officer (Jt CEO) James Lalnunmawia’n The Aizawl Post a hrilh danin, hming zawnchhuah leh paih hna hi theihtawpa chaka thawh a ni a, mi 4554 paih (delete) tawh niin, a zatve a tling thuak tawh.
A hna zawm thartu Joint CEO hian hming paih hna hi Mizoramin a mal beih loh thu leh Tripura nena thawh dun a ngaih thu a sawi a, an hriat danin, Tripura lam hian harsatna an nei a, hmun hrang hranga awmtir an tum laiin relief camp-a mite hian a hlawma awm an duh a, an awmna tura tihah an awm zung zung loh avangin Tripura lam hian duh anga chakin an thawk thei lo tih chu an hriat dan a nih thu a sawi.
Relief camp-a mite hi Tripura-ah in hmun pek an ni a, in sak tanpuina an dawng bawk. In saa an inbengbelte’n Tripura roll-a awm an dil a, chung mite chu Tripura-in Mizoramah thawnin, Mizoram election department-in an lo zawng leh a, an hmuhte hming chu paihin, Tripura lamin an roll-ah an thun ve thung thin.
Relief camp-ah hian mi engemaw zat an la awm avangin Tripura lam pawhin an hna hi an thawk chak thei lo tih thu dawn a ni.
A tirah chuan Tripura-a awm tate hming hi Mizoram inthlanpui hmaa Mizoram roll atanga thaichhiat kim hman tum a ni; inthlan hnuhnung berah khan Mizorama pawl hrang hrangin relief camp-a vote thlaktir lova Mizorama vote thlaktir an phut a, chutiang chuan Mizorama rawn kalin vote an lo thlak tawh.