Hna lak dana lungawilohna

Mizoram Legislative Assembly Secretariat-a thawk tur (Assistant, Translator, UDC, LDC) lak danah chhungkhat laina induhsakna a awm nia an hriat avangin MZP leh MSU chuan, hna lak cancel tura phutin nimin khan Assembly House kawtah lungawilohna lantirin an pungkhawm a.
Zirlai pawl pungkhawmte hian Mizoram Legislative Assembly Secretariat hna lak chu cancel tura an phut bakah, recruitment rules thar hnuaia hna lak an phut a; hnalak cancel a nih hma chuan cancel tura an hmalakna chhunzawm zel an tum thu resolution an siam a ni.
Zirlai pawlte an punkhawm hma ni hian Assembly Secretariat lam chuan thuchhuah siamin hna lak chungchang hi an lo sawifiah tawh a, hna lakna tihfel tawh chu sut leh chiah an ngai lo tih an sawi a.
Hna thar 11 laknaah hian mi pakuate chu Speaker leh Commissioner & Secretary te vua leh vangte an ni, tiin an inlaichin dan chiang takin zirlai pawlte hian an phochhuak a. Heta a lan danah hi chuan, ‘chhungkhat laina induhsakna’ tia inpuhna pawh hi a mawh lo hle niin a lang. Chutih laiin, exam an hmachhawn danah, ‘an thiam miau chuan lak loh ngawt theih a ni lo’ tih a awm thei a; chutih rualin, hna diltu exam hmachhawn mi sang chuang zinga a tling zinga 82% deuhthaw Speaker leh Commissioner & Secretary te vua leh vang an lo nih thup mai kha chuan, ‘an thiam miau chuan’ tia tanfung awm thei pawh a rinhlelhawm thei dawn hle a, mi naran tan pawh ‘a fair tawk lo a ni ang a’ tia ngaihdan siam mai a awl hle dawn a ni.
Hna laknaa rules hman hi “The Mizoram Legislative Assembly Secretariat (Recruitment and Conditions of Service) Rules, 1995 as amended” dan hman a nih thu Assembly Secretariat thuchhuahin a tarlan laiin, zirlai pawlte erawh chuan recruitment rules thar zawk hmang turin an phut ve thung a. Hetah pawh hian, recruitment rules thar zawk hmang lo va, a hlui zawk hman a nih chuan, rules hman danah pawh hian hnalak dan hi a felfai zan lo em ni ang, tih ngaihdan a awm thei bawk awm e.