By Laiu Fachhai
-- Advertisement --
Damdawi in te, sikul te, kalkawng te, khawlphetha te, tui connection leh thil dangte kan nei theihna turin kan State hian sum a mamawh a, chu sum mamawh tam zawk chu Central sawrkarin min rawn pe thin a ni. Central sawrkar chuan amahin tangka kung a nei lo. India ramfate (citizens) atanga chhiah chi hrang hrang – Direct Tax (Salary leh Income Tax dangte, Real Property Tax, Personal Property Tax, Taxes on Assets), Indirect Tax (GST, Custom Duty, Tax Deducted at Source) leh Non-Tax Revenue (Interest & Dividends, Sawrkar company leh corporation te atanga hlawkna) – a khawnte leh a hmuhte atangin national projects leh programte a kalpui a, State leh Union Territory lamte pawh tax devolution system hmangin kan chanvo tur budget allotment angin min pe chhuak thin. State, Union Territory, Autonomous District Council leh Local Government ten an khawn thei chhiahte a awm bawk.
Hlawh chhiah (salary tax) bik sawi ta ila. Tribal ni lo kan Indian-pui (Vai) sawrkar hna leh hna dang thawha hlawh neite chuan, kohhran leh Kristian NGOa thawktute telin, an hlawh atangin hlawh chhiah (salary tax) an pe thin. India sawrkarin FY 2023-24 tan a ruahman danah chuan, kum khat hlawh Rs nuai thum (thla hlawh Rs 25,000) thleng chu hlawh chhiah pek a ngai lo. Awl tir an ni. An thla hlawh Rs 25,001–50,000 groupten za zelah cheng nga (5%) hlawh chhiah an pe ang a, Rs 50,001–75,000 groupten 10% (sawma pakhat); Rs 75,001–100,000 groupten 15%; Rs 100,001–125,000 groupten 20% (sawma pahnih); Rs 125,001 leh a chunglam hlawhten 30% (sawma pathum) pe tura tih an ni. Senior citizen (kum 60 chung lam leh kum 80 chung lam) tan Income Tax an pek tur a hniam deuh hret. Kan State-ah pawh hian 30% (sawma pathum) hlawh chhiah petu tur an tam tawh a ni.
Non-tribalte chu hlawh chhiah chauh ni lovin, an sum lakluh (Income) dangte atang pawhin income tax an pe zel. Tribal areaa cheng tribalte erawh chu hlawh leh income dangte atanga chhiah pek awl tir (exempted) kan ni. Hnam hnufual leh rethei hle tura ngaih kan nih rih vang a ni awm e. Chuvangin Mizorama cheng hlawh nei tribalte chuan hlawh chhiah (salary tax) leh income tax dangte kan pe ve lo. Professional tax chauh kan hlawh atangin kan chawi thin. Thla hlawh Rs 5,000 thleng chu professional tax pek a ngai lo. Thla hlawh Rs 5,001–8,000 groupten thla tin Rs 75 an pe a; Rs 8,001–10,000 groupten Rs 120; Rs 10,001–12,000 groupten Rs 150; Rs 12,001–15,000 groupten Rs 180; Rs 15,001 leh a chung lam hlawhtuten thla tin Rs 208 (kum khatah Rs 2,500 vel) professional tax an pe thin. A beitham hle. Kuhva eitute tan chuan professional tax an pek hi thla tin an kuhvâ man aiin a let tamtakin a tlem zawk a ni. Mizorama contractorte, dawrkaite, sumdawngte, factory leh company neitute leh sum lakluhna dang neite pawh, tribal an nih chuan income tax awl tir an ni. Multi-crore mihausa mah ni sela tribal a ni a, tribal area-ah a awm chuan, income tax awl tir thei a ni.
Tribal mah ni sela tribal area-a cheng lote erawh chu income tax awl tir an ni ve lo. Hlawh chhiah leh Income tax dangte an pek ve a ngai. A awmzia chu, entirnan, Mizo IAS officer-te chuan tribal area ni lo (Guwahati, etc) ah te dah an nih chuan hlawh chhiah leh an income dangte atangin chhiah an pek a ngai a, tribal area (Mizoram, etc) ah dah an ni erawh chuan an pek a ngai lo. Tribal ni lote erawh chu, tribal areaa awm an ni emaw, non-tribal area-a awm an ni emaw, hlawh chhiah leh income tax dangte an pek zel a ngai thung. Entirnan, Mizoram Chief Secretary chu tribal ni ta sela, a thla hlawh chu nuai thum deuh thaw a ni ang a, income dangte pawh a nei maithei. Chutianga hlawh tam leh hausa pawh nise, tribal a ni a, tribal area Mizoramah sawrkar hna a thawh avangin hlawh chhiah leh income tax dangte a pe lo a, a salary income atangin professional tax chauh thla tin Rs 208 (kum khatah Rs 2,500) a pe thin a ni. A hnuaia thawk sing thum vel hlawh non-tribal (Vai) LDC erawh chuan, tribal area-ah sawrkar hna thawk mah se, tribal a ni loh avangin hlawh chhiah leh income tax dangte awl tir a ni ve lo. A hlawh atangin thla tin Rs 1,500 (kum khatah Rs 18,000) chhiah a chawi a, LDC-in Chief Secretary a chawm tihna tluk a ni. Income dang a neih chuan, a income atangin income tax a chawi tel a ngai bawk.
Tribal area-a awm tribal-te tan hlawh chhiah (salary tax) leh income tax dangte awl tir hi automatic a ni em, engtia kalpui nge a ni tih ka theih tawkin ka zir a. Ka hriat sual loh chuan, automatic ni lovin, awl tir tura dil a tul a ni awm e. A awmzia chu, awl tir kan dil a, phalsak kan nih chuan income tax kan chawi lo ang a, kan dil loh erawh chuan, thla tin cheng 25,000 aia tam hlawhtute chuan hlawh chhiah chu kan hlawh zat nen inmilin kan chawi thin a tul a ni. Sum lakluhna dang neitute pawh awl tir an duh chuan dil a ngai ve dawn a ni.
Hlawh chhiah (salary tax) ringawt pawh hi sawrkar sum (revenue) luh tamna leh sum hmuhna source nghet pakhat a ni a. Kan India ramfapui (citizenpui) ten rinawm tak leh thuawih taka an hlawh atanga chhiah an pek thin laia, tamtak phei chu Lal Isua Krista zuitu an ni lo a, keini chhiah pe tura Bible zirtirna dawng (Mathai 17.24-27; 22.15-22; Rom 13.6-7) Kristian berte ina hlawh chhiah kan pek ve lo chungchang ka ngaihtuah changin, ramfa kan nihna leh Kristian kan nihna kan mawhphurhna kan hlen lo hlein ka hre thin a, tlawm thlak ka tiin zahthlak ka ti hle thin. Mizorama kum tin crore-a sum lakluhtute leh multi-crore mihausate pawh, an aia sum lakluh tlem zawk non-tribalten income tax an pek thin laia, anni sum lakluh tam zawkte zawkin an pek ve loh te hi sawi chhuah ngam chi pawh a ni lo.
Vawikhat chu thlawhnaah Central India lam mi pakhat nen kan thu dun a. A thusawi leh a awmdan atangin lehkhathiam a ni tih a hriat theih a. Kan titi zelnaah, “In State chu salary tax leh income tax dangte in pe ve si lo a, keinin harsa chung chunga kan hlawh chhiah leh income tax dangte kan pek atangin Central sawrkarin a rawn thawn thin che u a, mahse a hmanna tur ruahmansa angin dik taka hmang lovin, corruption vangin sum tamtak a bo thin tihte kan hriat hian rilru a na duh hle thin,” min ti mai chu, “In state-ah corruption a awm ve lo em ni?” tiin ka zawt let hram na a, ka zak hle a ni.
Corruption sawi takah chuan, income tax pek hian corruption a do nghal a ni. An sum hmuhna leh hmuh dante thlenga ziah lan a ngaih dawn avangin, dik loh taka sum hmu leh a ruka hausate an tlem phah tawh dawn a ni. Income tax pek loa sum kawl teuh leh hausak chu dan bawhchhiatna a ni dawn a ni.
Mi tamtak chuan keini hi sawrkar chu kan ni tih hi kan hre lo. Sawrkar hi thil dang leh hmun dangah kan dah tlat a ni. Kan State sawrkar mah neitu nihna kan hauh thei loh chuan, Central sawrkar phei chu hla taka awm midang leh hnamdang angin kan ngai a, India neitu nihna feeling kan nei lian thei rih lo a ni. Chuvangin, “Income tax chu kan State chanvo pawh a ni lo a, Central lama chhuk tur a ni mai a, chuvangin kan pek loh pawh a pawi lo,” tia sawitute an awm thin. Hei hi a dik lo. Tax devolution system hmangin income tax kan pekte chu kan State-ah a rawn let leh thin dawn a ni.
Keini State ang tan phei chuan, kan income tax a tam rih loh avangin, kan pek zat aia tamin Central-in min rawn pe thin zawk a ni. Income tax kan pek chuan, sawrkar sum chu kan sum a nih tlat avangin, sawrkarin sum a enkawl dan leh a hman danah te kan thikthu kan tichhe thei tawh dawn a ni. Income tax pek loh hi, economically-in kan State hian thatpui aiin a chhiatpui zawk a ni. Income tax kan pek tur nen tehkhin chuan chhiah dang kan pek theihte hi chu tlemte a ni. Chuvangin income tax kan pek loh chuan, ramfa ni ve si, mahse ramfa dangte chhiah pek ring, chawmhlawm state kan ni reng dawn a ni. State puitling ni ve si a, income tax pe lo a, midang chhiah pek ring mai State ni chu a tlawm thlakin a zahthlak a ni.
India rama literary rate (ziak leh chhiar thiam) sang ber pahnihna hauh mek (91.33%), income nei tam, mihausa, lehkhathiam leh mithiam, hlawh nei, professor leh officer lian leh hlawh tam, in leh lo nei tha, Biak in ropui nei, mawtawr man to, MLA leh Minister te hlawh sang, khawsa thei, zaithiam, hnam huaisen leh chapo, New York Madison Square fashion pawh duai loa inchei sang leh inchei nalh ramfate awmna State leh a mihring tamtakte hi income tax awl tir tur tribal (hnam hnufual leh reithei) chu kan ang tawh lo asin maw le. Nimahsela quota leh concession hamthatna leh sum ngainat luatna avanga income tax exemption duhna avang tein, tribal (hnam hnufual leh reithei) nih reng hi tamtak chuan chhungril lamah zak tawh hle mah ila, kan thluakah erawh tribal nih a la thlang rih tlat hi maw. “Nangni tribal ho kha rawn kal teh u,” tiin non-tribal pakhatin min ko ta se, hmusit tawngkamah ngaiin kan haw viau awm si, mahse tribal nihna erawh kan thansan duh rih si lo ….
India-ah chuan tribal (adjective) hi hnam nihna (ethnic identity) a ni lo. Hmasawnna rahbi (stage of development) sawina a ni a, hmasawn rih lo, hnam hnufual leh rethei nih rihna a kawk a ni. Chuvangin tribal nih chu thil ropui leh chhuanawm tur a ni lem lo. Chapopuina tur a awm lo bawk. Hamthatna chi hrang hrang avangin tribal (hnam hnufual leh rethei) nih chu kan la thlang duh rih a nih pawhin, hlawh chhiah leh income tax dangte pe lo a, India ramfa (citizen) nihna mawhphurhna hlen lo nih zah nachang tal chu i hre tawh ang u khai. Tribal area-a awm tribal-te tan hlawh chhiah leh income tax dangte awltirna dan chu awm tho mah sela, awl tura dil chuang loin, professional tax chauh pe tawh loin, hlawh chhiah leh income tax dangte dik takin i pe ve tawh ang u. Keini aia hlawh tlem zawk leh rethei fe fe zawk kan Indianpui ten hlawh chhiah leh income tax dangte an pek theih chuan, kan pek ve theih lohna tur chhan a awm lo.
Income tax hi miretheite tan phurrit a ni lo. Thla tin cheng 25,000 aia tam income nei lo miretheite chuan income tax an pek a ngai lo. |henkhatin, “Income tak kan pek chuan, tribal kan nihna hlihsak kan ni mai dawn asin,” te an tih thin. Hlihsak kan nih a rinawm lo. Non-tribal area awm tribalten income tax an pe a, an tribal nihna hlihsak an ni lo. Chutiang bawkin Mizorama awm tribalten mahni chhia leh tha hriatna hmanga volunteer-in income tax kan chawi pawhin kan tribal nihna hlihsak kan nih a rinawm lo. Chhiah pek hi ramfa kan nihna mawhphurhna hlenna a ni a, chuvangin hlawh chhiah leh income tax dangte volunteer-in i pe ve tawh ang u. Chu chu Pathian Thu zirtirna a ni a, India ramfa kan nihna kan mawhphurhna a ni bawk e. Rinawm taka chhiah chawi thin responsible Christian leh citizen i ni tawh ang u.