Hna lakah minister-ten tih theih an nei tawh lo – Home minister

Hna lakah minister-ten tih theih an nei tawh lo – Home minister
Sawrkar hna lak danah Finance leh DP&AR kaltlang veka lak a nih tawh avangin minister-ten tih theih an nei tawh loa, induhsak loh vang niloin system an zawm vang a ni tih Home minister Lalchamliana chuan a sawi.
Thawhtannia an party office-a inkhawmah MNF adviser ni bawk Lalchamliana chuan hnalak dan chu engkim langtlang veka tih a ni tawh a. Finance leh DP&AR kaltlang vekin a ngai tawh, tia sawiin, “Written test leh interview paltlang lo tan chuan minister-ten tih theih an nei tawh lo. MNF hi MNF tan chauha thawk kan niloa, ram tana thawk kan ni. Hei hi induhsak loh vang niloin system kan neih vang a ni,” a ti.
Inthlanah chak reng theih a nih loh rualin an thawhsak mipui tan enge an tih, tih chu chhutsak fo a ngai tih a sawi a. Martar chhungte pawh a theih dan dana ngaihsak a tul tih hriain, an sawrkar tirh khan hma kan la chho tan a. Mahse, Covid-in a tihbuai vangin duh angin hma an la thei leh lo tih a sawi. “Mahni tan niloin midang tana an nun hlanna, the spirit of 1966 kan tih kha a takin a la thleng zel a ni,” a ti.
Opposition-ten chief minister leh Sport minister-te an bei nasa a, CM chu a ngawi thei em em tih MNF adviser hian a sawi. Pu Lalduhoma’n peace bonus chungchangah pu Zoramthanga nasa takin bei mahse, document nen lam Home ministry lehkhaah a lo awm vek si tih a sawi a. Infiammi pakhat inenkawlna pek chungchangah Assembly House-ah Pu Duhoma’n social media a rin lutuk vanga thudik lo a sawinaah ngaihdam a dil avangin, CM leh Pu Robert Romawia chuan beih nasat an hlawh phah ta bik tih te a sawi a ni.
Hruaitu hmasaten nasa takin an theih tawkin ram tan hna an thawh thu leh development reng rengin hun a duh rei thu te, state dang Mizoram aia upa leh changkangte nen intehkhin chi a nih loh thu te Lalchamliana hian a sawi bawk.
“Mipui sawrkar, kalphung thar kan din ang, titute hian an zawm em, tih ka zawt duh a. An Val Upa Council hi khawnge an awm tak, hlawhtlinna leh thangthat an lak deuh chuan thehhmeh ang maiin Val Upa Council an reh ta a, an MLA leh corporator-te hian an fund hman danah mipui a huap bik em,” tiin a zawt a ni.